پی ٹی آئی کے ایک اور رہنما کو اسلام آباد ہائیکورٹ سے ریلیف مل گیا ، نا اہلی کا فیصلہ معطل
اسلام آباد ( ڈیلی پاکستان آن لائن ) اسلام آباد ہائیکورٹ سے پاکستان تحریک انصاف کے ایک اور رہنما کو ریلیف مل گیا ، عدالت نے خیبرپختونخوا سے شاہ محمد کی نا اہلی کا الیکشن کمیشن کا فیصلہ معطل کر دیا۔
الیکشن کمیشن کی جانب سے نا اہل قرار دیے جانے پر خیبرپختونخوا سے پی ٹی آئی کے رکن صوبائی اسمبلی شاہ محمد نے اسلام آباد ہائیکورٹ سے رجوع کیا تھا، چیف جسٹس اطہر من اللہ نے الیکشن کمیشن کا فیصلہ معطل کرتے ہوئے فریقین کو نوٹسز جاری کر دیے ، عدالت نے 11 فروری کو جواب طلب کرلیا۔
درخواست گزار شاہ محمد کی جانب سے عدالت میں کہا گیا کہ حملہ مامور خان نے کیا اور خود ہی الیکشن کمیشن میں متاثرہ فریق بن گئے ، مامور خان نے حملہ شکست دیکھ کر کیا تھا۔
خیال رہے کہ الیکشن کمیشن نےخیبرپختونخوا کے بلدیاتی الیکشن کے دوران بنوں کی تحصیل بکا خیل میں امن و امان کے کیس میں شاہ محمد اور مامون الرشید کو یکم فروری کو نا اہل قرار دیا تھا۔
