ذہن کے بند دریچوں کو خدا را کھولو ۔۔۔حبسِ زنداں میں ذرا تازہ ہوا بھی آۓ

وہ جو آۓ ہیں تو پھر کالی گھٹا بھی آۓ 

اُن کی مہکی ہوئی زُلفوں کی ہوا بھی آۓ 

میری دانست میں تکمیلِ عبادت یہ ہے

پہلوۓ بُت میں اگر یادِ خدا بھی آۓ

غارتِ غُنچہ و گل صرصرِ صحرا ٹھہری 

بہرِ تزئینِ چمن بادِ صبا بھی آۓ

ذہن کے بند دریچوں کو خدا را کھولو

حبسِ زنداں میں ذرا تازہ ہوا بھی آۓ

لبِ بستہ پہ تو آئی ہے دعاۓ سوزاں

اشک پلکوں پہ مری بہرِ دعا بھی آۓ

جُرمِ الفت کا سزاوار جو دل ہے میرا 

نامہ آیا ہے ، تو پھر حکم سزا بھی آۓ

جعفری شہرِ خموشاں میں خموشی ہے بہت 

اب سرِ دار و رسن کوئی صدا بھی آۓ

کلام : ڈاکٹر مقصود جعفری (اسلام آباد)