وزیراعظم کوئٹہ پہنچ گئے ، سانحہ مچھ میں جاں بحق افراد کے لواحقین سے ملاقات کریں گے 

وزیراعظم کوئٹہ پہنچ گئے ، سانحہ مچھ میں جاں بحق افراد کے لواحقین سے ملاقات ...
وزیراعظم کوئٹہ پہنچ گئے ، سانحہ مچھ میں جاں بحق افراد کے لواحقین سے ملاقات کریں گے 

  

کوئٹہ (ڈیلی پاکستان آن لائن )وزیراعظم عمران خان کوئٹہ پہنچ گئے ہیں جہاں وہ مچھ سانحے میں جاں بحق ہونے والے افراد کے لواحقین سے اظہار تعزیت کریں گے۔

وزیراعظم عمران خان نور خان ائیر بیس سے کوئٹہ کے لیے روانہ ہوئے اور وزیر داخلہ شیخ رشید بھی ان کے ہمراہ تھے۔وزیراعظم عمران خان کوئٹہ آمد کے بعد وزیراعلیٰ سیکرٹریٹ پہنچے جہاں پولیس دستے نے انہیں سلامی پیش کی۔ذرائع کے مطابق وزیراعظم عمران خان بلوچستان میں امن و امان کی صورت حال سے متعلق اجلاس کی صدارت بھی کریں گے اور انہیں سانحہ مچھ سے متعلق بریفنگ بھی دی جائے گی۔

وزیراعظم عمران خان سانحہ مچھ کے متاثرین سے ملاقات کر کے اظہار تعزیت کریں گے، اس کے علاوہ وزیراعظم ہزارہ عمائدین سے بھی ملاقات کریں گے اور ان کے تحفظات سنیں گے۔ 

خیال رہے کہ 7 روز قبل مچھ میں نامعلوم مسلح دہشتگردوں نے کوئلے کی کان میں کام کرنے والے 11 کان کنوں کو فائرنگ کر کے شہید کر دیا تھا۔لواحقین نے کوئٹہ کے شدید سرد موسم میں 6 روز تک اپنے پیاروں کی لاشیں رکھ کر احتجاج کیا اور ان کا مطالبہ تھا کہ وزیراعظم کے آنے تک لاشوں کی تدفین نہیں کی جائے گی تاہم گزشتہ رات ہزارہ ایکشن کمیٹی اور حکومت کے درمیان کامیاب مذاکرات کے بعد سانحہ مچھ میں جاں بحق افراد کی آج تدفی کر دی گئی ہے۔

یاد رہے کہ گزشتہ روز وزیراعظم عمران خان نے اعلان کیا تھا کہ ہزارہ برادری کے تمام مطالبات تسلیم کر لئے گئے ہیں اس لیے میری آمد کو تدفین سے مشروط نہ کیا جائے ، آپ آج تدفین کر دیں میں آج ہی کوئٹہ آجاﺅں گا ۔

مزید :

اہم خبریں -قومی -