جنیوا کانفرنس، فرانس نے پاکستان کے سیلاب متاثرین کیلئے کتنی امداد کا اعلان کر دیا ؟ جانئے
جنیوا(ڈیلی پاکستان آن لائن )فرانسیسی صدر میکرون نے جنیوا میں ہونے والی پاکستان میں سیلاب متاثرین کیلئے مدد کیلئے کانفرنس میں ایک کروڑ ڈالر امداد کا اعلان کر دیاہے ۔
تقریب سے خطاب کرتے ہوئے فرانسیسی صدر میکرون کا کہناتھا کہ کوئی شک نہیں کہ سیلاب سے پاکستان میں تباہی ہوئی ، پاکستان نے بہادری کے ساتھ سیلاب سے ہونے والی تباہی کا مقابلہ کیا ، سیلاب متاثرین کی بحالی کیلئے ہر ممکن تعاون کریں گے ، عالمی اداروں سے بھی پاکستان کی مدد کا مطالبہ کرتاہوں ، ذاتی سطح پر پاکستان کے وزیراعظم کو سپورٹ فراہم کرنے کیلئے تیار ہیں ۔ فرانسیسی عوام اور حکومت کی جانب سے پاکستانی عوام سے ہمدردی کا اظہار کرتے ہیں ۔
یو این سیکریٹری ایٹونیو گوتریس نے تقریب سے خطاب کرتے ہوئے کہا کہ مشکل حالات میں بھی پاکستانیوں کا جذبہ دیکھ کر حیران ہوں ، انفراسٹرکچر کی بحالی کیلئے بڑے پیمانے پر اقدامات کی ضرورت ہے ، موسمیاتی تبدیلیوں سے متاثرہ ممالک کو سپورٹ کرنے کی ضرورت ہے ، پاکستان میں حالیہ سیلاب سے بڑا حصہ متاثر ہو اہے ،پاکستان میں ہونے والی تباہی کا خود جا کر مشاہدہ کیا ، پاکستان میں سیلاب کی صورتحال کے مناظر دیکھ کر دل ٹوٹ گیا ،سیلاب سے اسی لاکھ کے قریب لوگ بے گھر ہوئے ہیں ۔