18 سالہ ایرانی لڑکی نے اپنے بیڈ روم سے ایسی ویڈیو بنا کر شیئر کروادی کہ اسے گرفتار کرلیا گیا
تہران(مانیٹرنگ ڈیسک) گزشتہ روز ایران میں ایک 18سالہ لڑکی کو پولیس نے گرفتار کر لیا ہے، جس پر ایسا کام کرنے کا الزام ہے کہ سن کر آپ سوچ میں پڑ جائیں گے کہ اس پر بھی گرفتاری ہوسکتی ہے۔ دی انڈیپنڈنٹ کی رپورٹ کے مطابق مائیدہ حجابری نامی اس لڑکی نے اپنے انسٹاگرام اکاﺅنٹ پر ایک ویڈیو پوسٹ کی تھی۔اپنے بیڈروم میں بنائی گئی اس ویڈیومیں وہ مغربی لباس پہنے ڈانس کر رہی ہوتی ہے۔ چونکہ ایران میں خواتین کے لیے ایسا لباس پہن کر کھلے عام آنا، یا جسم کی نمائش کرنا قابل گرفت جرم ہے، لہٰذا پولیس نے اسے حراست میں لے کر اس کے خلاف مقدمہ درج کر لیا ہے۔
رپورٹ کے مطابق گرفتاری کے بعد مائیدہ کا ایک بیان ایران کے سرکاری ٹی وی پر نشر کیا گیا جس میں اس نے ملک کی اخلاقی اقدار کی پامالی کا اعتراف کیا۔ اس بیان میں اس کا کہنا تھا کہ ”یہ ویڈیو پوسٹ کرنے کا مقصد صرف لوگوں کو اپنی طرف متوجہ کرنا اوراپنے فالوورز کی تعداد بڑھانا تھا۔“ایرانی پولیس کی طرف سے جاری ایک بیان میں کہا گیا ہے کہ ”انسٹاگرام پر کئی ایسے اکاﺅنٹس ہیں جن پر ایسی ویڈیوز پوسٹ کی جا رہی ہیں۔ یہ اکاﺅنٹ جعلی ہیں اور ان کا سراغ لگانا مشکل ہے چنانچہ ہم ان اکاﺅنٹس کو بلاک کر رہے ہیں اور عدلیہ ملک میں انسٹاگرام پر پابندی عائد کرنے پر بھی غور کر رہی ہے۔“
