50ارب کا ٹیکس چوری کرنیوالی 8بڑی سٹیل ملز کیخلاف ایف بی آر کاشکنجہ تیار، نوٹسز جاری

50ارب کا ٹیکس چوری کرنیوالی 8بڑی سٹیل ملز کیخلاف ایف بی آر کاشکنجہ تیار، ...

  

ٍ اسلام آباد(آن لائن)بی ایف آر نے 8 بڑی سٹیل ملز کے مالکان کی طرف سے ایس آر او 565 کی چھتری تلے سالانہ 50ارب روپے سے زائد کا ٹیکس چوری کرنیوالوں کو خریداروں سمیت نوٹسز جاری کردیئے ہیں، ایف بی آر نے 192 خریداروں کو نئے نوٹسز جاری کیے ہیں۔ سرکاری دستاویزات کے مطابق سب سے زیادہ فائدہ آئی ایس ایل اور بی بی جے پائیپس نے اٹھایا ہے دیگر کمپنیوں میں عائشہ سٹیل کراچی، اے ایچ این لاہور، بی بی جے سٹیل لاہور، ایم اے بی اسلام آباد، روبی سٹیل لاہور اور اجمیر سٹیل لاہور شامل ہیں۔ ایف بی آر کے ریکارڈ کے مطابق کمپنیا ں چھوٹے چھوٹے دکانداروں کو کروڑوں روپے مال کی فروخت کی رسیدیں تیار کرتی رہیں جبکہ ابتدائی تحقیقات سے معلوم ہوا ہے کہ یہ خریدار اتنا مال خریدنے کی طاقت ہی نہیں رکھتے تھے لیکن ایس آر او 565 کا فائدہ اٹھا کر اربوں روپے کا ٹیکس بچانے کے لئے یہ ڈرامہ رچایا گیا۔ ایس آر او 565سے فائدہ اٹھانے والے یہ وہی لوگ ہیں جن کی وجہ سے پاکستان سٹیل ملز تباہی کے دہانے پر پہنچ گئی اور چھوٹی صنعتیں بندش کے بالکل قریب ہیں جس کی وجہ سے دس لاکھ لوگوں کے بیروز گار ہونے کا خدشہ بھی پیدا ہوچکا ہے۔ مزید برآں ان کمپنی مالکان نے ایس آر او 565 کے ذریعے بچائے گئے ٹیکس کو ہضم کرنے کے لئے اب حکومت میں بیٹھے ہوئے اپنے سرپرستوں کے ذریعے یہ کوشش شروع کردی ہیں کہ مذکورہ قانون کی دفعہ4کو ختم کردیا جائے تاکہ ماضی میں ہونیوالی تمام کرپشن محفوظ ہو جائے اور کوئی بھی ادارہ اس حوالے سے پوچھ گچھ نہ کرسکے۔ذرائع کے مطابق ٹیکس ڈیپارٹمنٹ نے کسٹمز ایکٹ کی دفعہ 26 اور 26اے کے تحت یہ ساری معلومات اکٹھی کی ہیں۔ ایف بی آر اسلام آباد کی طرف سے ایسی تمام کمپنیوں کا آڈٹ کرنے کے احکامات بھی دے دیئے ہیں جو ایس آر او 565 کے تحت مال تیار کرتی رہی ہیں۔

شکنجہ تیار

مزید :

صفحہ آخر -