فوجی عدالتوں ،پارلیمانی نظام پر پیپلز پارٹی موقف تبدیل نہیں کریگی :قمر زمان کائرہ

 
       نوشہرہ (آن لائن ) وزیراعظم پاکستان کے مشیر برائے امورکشمیر و گلگت بلتستان قمر زمان کائرہ نے کہا ہے کہ فوجی عدالتوں اور وفاقی پارلیمانی نظام پر پاکستان پیپلز پارٹی اپنا موقف نہیں بدلے گی۔9مئی کے ملزمان کاان کے جرم کے مطابق ٹرائل ہونا چاہئیے۔فوجی عدلتوں میں تحریک انصاف کے مقدمات چلنے چاہئے یا نہیں حکومت غیرجانبدار ہے کوئی مداخلت نہیں کی جارہی۔ ان خیالات کا اظہار انہوں نے نوشہرہ میں پاکستان پیپلز پارٹی پشاور ڈویژن کے صدر اور سابق صوبائی وزیر لیاقت شباب کی وفات پر ان کے گھر تعزیت اور فاتحہ خوانی کے بعد میڈیا سے بات چیت کرتے ہوئے کیا ۔ انہوں نے کہا دہشت گردی کے خاتمہ کیلئے حکومت نیشنل ایکشن پلان پر اس کی روح کے مطابق عمل پیرا ہے ۔صوبوں کو ان کے حصے کا شیئر دینے کے سلسلے میں پی ڈی ایم کی حکومت نے واضح اقدامات لیے ہیں۔بی بی شہید نے دہشت گردی اور آمریت کے خلاف عوام کے حقوق کی جنگ لڑتے ہوئے جام شہادت نوش کیا، پیپلز پارٹی کا عزم ہے کہ دہشت گردوں کے سامنے جھکنے کو ہرگز تیار نہیں۔پاکستان پیپلز پارٹی پی ڈی ایم کا حصہ نہیں بلکہ مرکزی حکومت میں اتحادی ہے عام انتخابات پاکستان پیپلز پارٹی اپنے تیر کے نشان پر ہی لڑے گی اور حکومت بنائے گی۔
قمر زمان کائرہ