روزانہ کتنے گلاس پانی پینا چاہیے؟
آپ نے اکثر سنا ہوگا کہ اچھی صحت کے لیے روزانہ 8 گلاس پانی پینا ضروری ہے ،لیکن کیا یہ بات واقعی درست ہے؟
انسانی جسم کا 60 فیصد حصہ پانی پر مشتمل ہے اسی لئے ہمیں اپنے تمام جسمانی افعال کے لیے پانی کی ضرورت ہوتی ہے۔ پانی انسانی جسم کے مختلف اعضا ءسے زہریلے مواد کو خارج کرتا اور خلیات تک غذائی اجزاءپہنچاتا ہے، نیز یہ انسانی جسم میں جوڑوں کے لیے گریس کا کام کرنے کے ساتھ ساتھ کھانے کو ہضم کرنے میں مدد بھی فراہم کرتا ہے،اس لئے اگر آپ پانی کی مناسب مقدار کا استعمال نہ کریں تو ڈی ہائیڈریشن کے نتیجے میں سانس میں بو، سر چکرانے، ذہنی الجھن اور دیگر مسائل کا سامنا ہوسکتا ہے۔
جسم میں پانی کی کمی کا اشارہ دینے والی عام نشانیاں : یہاں ایک اہم سوال یہ ہے کہ اچھی صحت کے لیے انسانی جسم کو روزانہ کتنے پانی کی ضرورت ہوتی ہے؟ یہ جو اچھی صحت کے لیے روزانہ 8 گلاس پانی پینے کا کہا جاتا ہے ضروری نہیں کہ یہ بات درست ہو۔
امریکہ کے انسٹیٹیوٹ آف میڈیسن آف دی نیشنل اکیڈمیز نے پانی کی مقدار کے حوالے سے چند سفارشات کی ہیں جن کے مطابق 4 سے 8 سال کے بچوں کو روزانہ 7 کپ پانی پینا چاہیے اور9 سے 13 سال کے لڑکوں کو 10 جبکہ اسی عمر کی لڑکیوں کو 9 کپ پانی پینا چاہیے۔14 سے 18 سال کے لڑکوں کو 14 جبکہ اسی عمر کی لڑکیوں کو 10 کپ پانی پینا چاہیے۔ اسی طرح بالغ خواتین کو روزانہ 2.7 لیٹر (یا 11 کپ) جبکہ مردوں کو 3.7 لیٹر (یا 15 کپ) پانی پینا چاہیے۔
واضح رہے کہ اتنی مقدار میں سیال ضروری نہیں کہ اسے صرف پانی کے ذریعے جسم کا حصہ بنایا جائے۔عموماً جو غذا کھائی جاتی ہے اسی سے جسم کو روزانہ درکار سیال کا 20 فیصد تک حصہ مل جاتا ہے جیسے کہ آپ پھلوں اور سبزیوں پر مشتمل غذا کا زیادہ استعمال کرتے ہیں، اسی طرح غذا سے ہٹ کر چائے، کافی اور دیگر مشروبات سے بھی جسم کے لیے پانی کی ضروریات کو پورا کرنے میں مدد ملتی ہے۔
اگر موسم گرم ہو تو پھر زیادہ پانی کی ضرورت ہوسکتی ہے ،خاص طور پر اگر پسینہ زیادہ آرہا ہے۔ اسی طرح موسمی بیماری جیسے نزلہ زکام، بخار یا ہیضہ ہونے پر بھی زیادہ پانی پینے کی ضرورت ہوتی ہے۔کچھ امراض جیسے ہارٹ فیلیئر یا گردوں کے مخصوص امراض پر پانی کی مقدار محدود کرنے کی ضرورت ہوتی ہے لیکن اس کا فیصلہ ڈاکٹر سے مشورہ کرکے کیا جائے۔ایک اور اہم سوال یہ ہے کہ انسانی جسم میں پانی کی کمی کا اندازہ کیسے کیا جائے؟ آپ کو اگر پیاس کا احساس کم ہوتا ہے تو پیشاب کی رنگت سے بھی جسم میں پانی کی کمی کا اندازہ لگایا جاسکتا ہے۔اگر پیشاب کی رنگت شفاف یا ہلکی زرد ہے تو یہ اس بات کا اشارہ ہے کہ جسم کو مناسب مقدار میں پانی دستیاب ہے؛ البتہ گہری رنگت پر پانی پینا بہتر ہوتا ہے۔ ٭٭٭
