سابق بالی ووڈ اداکارہ ثنا خان نے بیٹے کا نام ’’طارق جمیل‘‘ رکھ دیا

نئی دہلی (ڈیلی پاکستان آن لائن)بالی ووڈ سے کنارہ کشی اختیار کرنے والی سابقہ بھارتی اداکارہ ثناخان نے اپنے بیٹے کا نام سید طارق جمیل رکھ دیا ہے۔بھارتی میڈیا کے مطابق ثنا خان کا کہنا ہے کہ نام کا شخصیت پر بہت اثر پڑتا ہے، وہ بیٹے کے لیے ایک ایسا نام چاہتی تھی جو دین داری، بردباری، نرمی، اور دیانت داری کی علامت ہو۔

ثنا خان کا کہنا ہے کہ انہیں ابھی تک یقین نہیں آ رہا کہ یہ ان کی اولاد ہے، ماں بننا زندگی کا سب سے خوبصورت احساس ہے۔ان کا کہنا ہے کہ مجھے ابھی تک ایسا لگتا ہے کہ میں نے کسی اور کا بچہ اٹھایا ہوا ہے، ماں باپ بننا زندگی بھر کی ذمے داری ہے۔

خیال رہے کہ حال ہی میں ثنا خان اور ان کے شوہر مفتی انس کے یہاں بیٹے کی پیدائش ہوئی ہے۔انہوں نے نومبر 2020 میں بھارتی ریاست گجرات سے تعلق رکھنے والے مفتی انس سے شادی کی تھی۔