عتمرین کی خدمت کے لیے سعودیہ ائیر کی تیاریوں میں بھرپور اضافہ
جدہ (این این آئی) سعودی عرب کی فضائی کمپنی سعودیہ نے باور کرایا ہے کہ اس نے معتمرین کی آمد ورفت کے لیے تمام سہولتیں پیش کرنے کے واسطے اپنی تیاریوں میں اضافہ کرتے ہوئے اضافی پروازوں کا نظام اوقات جاری کر دیا ہے۔ یہ اقدامات دنیا بھر سے عمرے کی ادائیگی کے لیے آنے والے اللہ کے مہمانوں کی خدمت اور دیکھ بھال کی کوششوں کا حصہ ہیں۔میڈیارپورٹس کے مطابق فضائی کمپنی سعودیہ کے سرکاری ترجمان انجینئر عبدالرحمن الطیب نے بتایا کہ ان کی کمپنی اس فضیلت والے مہینے میں معترمین کی خدمت کے لیے اپنے تمام تر وسائل کو بروئے کار لا رہی ہے۔
ان دنوں عمرے کی ادائیگی اور مسجد نبوی کی زیارت پر لوگوں کا بہت زیادہ زور ہے جس کے سبب مملکت کی جانب سے اللہ کے مہمانوں کی خدمت کے لیے کوششوں میں بھی بھرپور اضافہ ہو جاتا ہے۔الطیب نے مزید بتایا کہ حالیہ دنوں میں اْن پروازوں میں نشستوں کی گنجائش میں بھی اضافہ کر دیا گیا ہے جن کو عازمین عمرہ کی بڑی تعداد کا سامنا ہے۔ انہوں نے باور کرایا کہ دنیا بھر میں سعودیہ کے دفاتر عازمین عمرہ کے لیے خصوصی خدمات پیش کرنے کے واسطے مصروفِ عمل ہیں۔
