گرمی کی شدت کیساتھ غیر اعلانیہ لوڈ شیڈنگ 12 گھنٹے تک پہنچ گئی، صارفین کیلئے بری خبر
اسلام آباد ( ڈیلی پاکستان آن لائن) گرمی بڑھتے ہی ملک کے مختلف علاقوں میں غیر اعلانیہ لوڈ شیڈنگ 6 سے 12 گھنٹے تک پہنچ گئی جس کے باعث گرمی کے ستائے شہری بلبلا اٹھے ۔
نجی ٹی وی نیو نیوز کے مطابق دیہی علاقوں میں 12 گھنٹے سے بھی زائد کی لوڈ شیڈنگ جاری ہے ، شہری علاقوں میں غیر اعلانیہ لوڈ شیڈنگ کا دورایہ 6 گھنٹے تک پہنچ گیا ہے ۔ ترجمان پاور ڈویژن کے مطابق اس وقت ملک میں بجلی کی پیداوار 22 ہزار 250 میگاواٹ جبکہ طلب 23 ہزار 174 میگاواٹ ہے ۔ اس وقت ملک میں بجلی کا عارضی شارٹ فال 924 میگاواٹ ہے ۔
ترجمان پاور ڈویژن کی جانب سے کہا گیا کہ تربیلا میں کم پانی کے اخراج سے ہائیڈل پاور جنریشن تین ہزار میگاواٹ کم ہو گئی ہے ، عارضی لوڈ مینجمنٹ پر صارفین سے معذرت خواہ ہیں ۔
