”یہ ملاقات کوئی ڈیٹ نہیں تھی، نوٹس لینے یونیورسٹی گئی اور 15 منٹ کے لیے ملنے کا فیصلہ کیا“ لڑکی نے اپنی محبت کی داستان شیئر کردی، انٹرنیٹ پر طوفان

نئی دہلی(مانیٹرنگ ڈیسک)سوشل میڈیا پر ملاقات محبت میں بدل کر شادی تک جا پہنچنے کی خبریں گاہے آتی رہتی ہیں۔ اس خاتون کی کہانی بھی ایسی ہی ہے جس نے ٹوئٹر صارفین کو رشک میں مبتلا کر دیا۔ انڈیا ٹائمز کے مطابق حرمت مجید نامی اس لڑکی نے اپنے ٹوئٹر اکاﺅنٹ @MajidHurmatKhiپر ایک ٹویٹ میں لکھا ہے کہ ”یہ ملاقات کوئی ’ڈیٹ‘ بھی نہیں تھی۔ میں نوٹس لینے یونیورسٹی گئی تھی۔ ایک لڑکا جس کے ساتھ میری ٹوئٹر پر بات چیت ہوتی تھی، اس سے 15منٹ کے لیے ملنے کا فیصلہ کیا۔“

Wasn't even supposed to be a date. Went to uni to pick notes up, a guy I was talking to on Twitter decided to meet 'for 15 minutes'. We sat and talked for 4 hours, so engrossed that we forgot to eat or drink.
10 years later, this is my morning view and I wouldn't change a thing. https://t.co/Jtepn8ItI7 pic.twitter.com/QUV0iEjliN

— Hurmat Majid (@MajidHurmatKhi) June 2, 2023

حرمت مجید ٹویٹ میں مزید لکھتی ہے کہ ”ہم دونوں بیٹھے اور 4گھنٹے تک گفتگو کرتے چلے گئے۔ ہم دونوں ایک دوسرے میں ایسے کھو گئے کہ کھانا پینا بھی بھول گئے۔آج اس ملاقات کے 10سال بعد صبح کے وقت یہ منظر میرے سامنے ہے اور میں اس میں کوئی ایک بھی تبدیلی نہیں کرنا چاہوں گی۔“
اس ٹویٹ میں حرمت مجید نے اپنے شوہر اور بیٹے کی تصویر بھی شیئر کی۔ اس کی یہ ٹویٹ ایسی وائرل ہوئی کہ اب تک اسے 14لاکھ سے زائد لوگ دیکھ چکے ہیں اور بیشتر لوگ حرمت مجید اور اس کے شوہر کی محبت کی اس انوکھی کہانی پر رشک کا اظہار کر رہے ہیں۔ 
ذیلی ٹویٹ میں کچھ اور خواتین بھی اپنی ایسی ہی کہانیاں شیئر کر رہی ہیں۔ زومبی گرل نامی اکاﺅنٹ سے ایک خاتون نے بتایا کہ ”مجھے اس رات سے بہت محبت ہے جس رات میں اپنے شوہر سے ملی۔ ہم نے تمام رات، صبح تک باتیں کیں۔ ہم نے باتیں کیں کہ ہمارا گھر کیسا ہو گااور ہمارے بچے کتنے ہوں گے۔ آج 14سال بعد ہمارے پاس ایک سفید گھر ہے، نیلا نہیں۔ اور ہماری کوئی اولاد نہیں ہے۔ اس کے باوجود میں آج اپنی زندگی سے کچھ بھی تبدیلی نہیں کرنا چاہوں گی۔“