کورونا سے جاں بحق اہلکار کو شہید کا درجہ دیا جائے، ایڈیشنل آئی جی

  کورونا سے جاں بحق اہلکار کو شہید کا درجہ دیا جائے، ایڈیشنل آئی جی

  

کراچی(کرائم رپورٹر)ایڈیشنل آئی جی کراچی غلام نبی میمن نے آئی جی سندھ مشتاق مہر کو خط لکھ دیا ہے جس میں ان سے اپیل کی ہے کہ ڈیوٹی کے دوران کورونا سے جاں بحق اہلکاروں کو شہید کا درجہ دیا جائے۔ذرائع کے مطابق کراچی پولیس چیف غلام نبی میمن کی جانب سے آئی جی سندھ مشتاق مہر کو گزشتہ روزخط لکھا گیا ہے۔خط میں ایڈیشنل آئی جی غلام نبی میمن نے آئی جی سندھ مشتاق مہر کے ذریعے حکومتِ سندھ سے سفارش کی ہے۔ذرائع نے بتایا کہ خط میں لکھا گیا ہے کہ کراچی پولیس کے 2 اہلکار اب تک کورونا وائرس سے جاں بحق ہو چکے ہیں، جبکہ فیلڈ اور دفاتر میں آنے والے درجنوں اہلکار کورونا وائرس سے متاثر ہوئے ہیں۔ذرائع کے مطابق شہید کا درجہ ملنے سے اہلکار کے اہلِ خانہ کو شہید کوٹے کی مراعات حاصل ہوں گی، پولیس شہدا کے ورثا کو ایک کروڑ روپے معاوضہ دیا جاتا ہے۔ذرائع نے بتایا کہ پولیس کے شہید کے خاندان کے ایک فرد کو پولیس میں نوکری دی جاتی ہے، جبکہ ریٹائرمنٹ تک بیوہ یا اہلِ خانہ کو تنخواہ بمعہ مراعات دی جاتی ہے۔ذرائع نے بتایاکہ خط کے ساتھ 21 مارچ 2018 کو جاری کیے گئے آرڈر کی کاپی بھی منسلک کی گئی ہے۔

مزید :

راولپنڈی صفحہ آخر -