مولانا فضل الرحمان کے آزادی مارچ میں شرکت سے متعلق ن لیگ کی اہم پیش رفت
لاہور (ڈیلی پاکستان آن لائن)مسلم لیگ ن کے رہنما احسن اقبال نے کہاہے کہ ن لیگ نے فضل الرحمان کے دھرنے میں شرکت سے متعلق ن لیگ نے اپنی سفارشات تیار کرلی ہیں ، کل ن لیگ کے صدر شہباز شریف پارٹی قائد میاں نواز شریف سے ملاقات کریں گے اور جو بھی پارٹی صدر کا فیصلہ ہوگا اس پر اعلان کردیاجائے گا ۔
تفصیلات کے مطابق لاہور میں ن لیگ کے رہنماﺅں کے ساتھ پریس کانفرنس کرتے ہوئے احسن اقبال نے کہا کہ حکومتی وزراءکو مولانا فضل الرحمان کے دھرنے کے حوالے سے اشتعال انگیز بیانات دینے کی بجائے اپنے اور اپنے لیڈر کے وہ کلپ دیکھنے چاہئے جو وہ اپنے دھرنے کے دنوں میں دیا کرتے تھے ، اس سے ان کی سیاسی تربیت ہوگی ، حکومتی وزراءکے مولانا فضل الرحمان کے آزادی مارچ کے بار ے میں بیانات قابل مذمت ہیں۔ انہوں نے کہا کہ ن لیگ نے فضل الرحمان کے دھرنے میں شرکت سے متعلق ن لیگ نے اپنی سفارشات تیار کرلی ہیں ، ا س سلسلے میں کل ن لیگ کے صدر شہباز شریف پارٹی قائد میاں نواز شریف سے ملاقات کریں گے اور جو بھی پارٹی صدر کا فیصلہ ہوگا اس پر اعلان کردیاجائے گا ۔
احسن اقبال کا کہنا تھا کہ وزیر اعظم کوصرف اپوزیشن کو جیل میں قید کرنے کی فکر ہے ، رانا ثناءاللہ پر جھوٹا مقدمہ بنایا گیاہے ۔ انہوں نے کہا کہ عمران خان کے ذہن میں اپوزیشن کوجیلوں میں ڈالنے کے سوا کچھ نہیں ہے ، ان کو فکر ہے کہ اپوزیشن کوکیسے جیلوں میں ڈالیں ؟مسلم لیگ ن اس وقت عمران خان کے حسد کا نشانہ بنی ہوئی ہے ۔