بجلی چور قوم کے دشمن ہیں کوئی رعایت نہیں برتی جائے گی :چیف ایگزیکٹو لیسکو کا ایسیز اور فنکشنل ہیڈز کے اجلاس سے خطاب
لاہور ( ڈیلی پاکستان آن لائن ) چیف ایگزیکٹولیسکو انجینیئر محمد رمضان بٹ نے لیسکو ہیڈ آفس میں فنکشنل ہیڈ سمیت تمام سرکلز کے ایسیز کے ساتھ ایک اہم اجلاس کے صدارت کی۔ اجلاس میں وزیراعظم شہباز شریف اور وفاقی وزیر توانائی سردار اویس احمد خان لغاری کی ہدایات پر عمل درآمد کے حوالے سے تفصیلی گفتگو کی گئی۔
چیف ایگزیکٹو لیسکو انجینیئر محمد رمضان بٹ نے کہا کہ رشوت اور بجلی چوری پر ہماری زیرو ٹالرنس پالیسی ہے بجلی چور قوم کے دشمن ہیں ان سے کوئی رعایت نہیں برتی جائے گی۔ صارفین ہماری اصل طاقت اور سرمایہ ہیں چاہے وہ عام صارف ہوں یا صنعتی سب کے ساتھ برابری کی بنیاد پر برتاؤ کیا جائے۔ انہوں نے ہدایات کی کہ تمام افسران اور ملازمین کسی بھی دباؤ یا کسی بھی تناؤ کی حالت میں صبر اور تحمل کا مظاہرہ کریں اور صارفین کے ساتھ کسی بھی صورت سخت قسم کے الفاظ استعمال نہ کریں۔
انجینیئر محمد رمضان بٹ کا مزید کہنا تھا کہ لیسکو کی بہتری کے لیے اس وقت حکومت، وزیر توانائی سردار اویس احمد خان لغاری، لیسکو چیئرمین بورڈ آف ڈائریکٹر عامر ضیاء اور تمام لیسکو بورڈ ممبران کا مکمل تعاون ہمیں حاصل ہے اور ادارے میں ملازمین کو بہترین کام کا ماحول فراہم کرنے کے لیے ہم سب ایک ساتھ ہیں۔
آخر میں انہوں نے اپنے تمام افسران اور ملازمین کی کارکردگی کو سراہا اور کہا کہ تبدیلی مشکل ضرور ہے لیکن ناممکن نہیں ۔ انہوں نے ایک بار پھر ہدایت کی کہ صارفین کے ساتھ خوش اخلاقی سے پیش آئیں ان کا احترام کریں اور کسی صورت سخت لہجے کا استعمال نہ کریں۔
