ڈاکٹر فاروق عادل کی تصنیف ’’دیکھا جنہیں پلٹ کے ‘‘ پر نیشنل انسٹی ٹیوٹ آف پبلک پالیسی میں ادبی نشست کا اہتمام، مجیب الرحمان شامی ، عطاء الحق قاسمی سمیت اہم شخصیات کی شرکت
لاہور ( ڈیلی پاکستان آن لائن ) نیشنل انسٹی ٹیوٹ آف پبلک پالیسی (NIPP) ، جو نیشنل سکول آف پبلک پالیسی (NSPP) لاہور کا ایک ذیلی ادارہ ہے ، نے معروف ادیب اور صحافی ڈاکٹر فاروق عادل کی تصنیف ’’دیکھا جنہیں پلٹ کے ‘‘ پر ایک علمی و فکری نشست کا اہتمام کیا ۔ اس نشست میں میں ممتاز شخصیات نے شرکت کی جن میں سینئر صحافی مجیب الرحمان شامی ، معروف کالم نگار اور شاعر عطاء الحق قاسمی ، ریکٹر نیشنل سکول آف پبلک پالیسی ڈاکٹر محمد جمیل آفاقی اور ڈین ، نیشنل انسٹی ٹیوٹ آف پبلک پالیسی ڈاکٹر نوید الہیٰ شامل تھے ۔
ڈاکٹر محمد جمیل آفاقی نے اپنے ابتدائی کلمات میں عوامی اداروں میں فکری و ادبی سرگرمیوں کی اہمیت پر روشنی ڈالی ۔ انہوں نے کہا کہ اس نوعیت کے پروگرام سول سرونٹس اور محققین کو موقع فراہم کرتے ہیں کہ وہ ان ثقافتی و سماجی بیانیوں پر غور کریں جو ہماری قومی شناخت کی تشکیل میں کردار ادا کرتے ہیں ۔ ڈاکٹر آفاقی نے ڈاکٹر فاروق عادل کی اردو ادب اور صحافت میں خدمات کو سراہااور کہا کہ ان کے مضامین گہری فکری بصیرت رکھتے ہیں اور معاشرتی و سیاسی ارتقاء کو سمجھنے میں مدد دیتے ہیں ۔
نشست کے دوران ڈاکٹر فاروق عادل نے اپنی کتاب ’’دیکھا جنہیں پلٹ کے ‘‘ کے پس منظر اور اس کے تخلیقی محرکات پر گفتگو کی ۔ انہوں نے اس بات پر زور دیا کہ ذاتی تجربات اور تاریخی لمحات کا ریکارڈ محفوظ رکھنا قومی شعور کے فروغ کیلیے نہایت اہم ہے ۔
کلیدی مقررین مجیب الرحمان شامی اور عطاء الحق قاسمی نے مصنف کے اسلوب اور فکر کی گہرائی کو سراہا اور کہا کہ یہ کتاب یادداشت ، عکاسی اور صحافتی بصیرت کا حسین امتزاج ہے ۔ انہوں نے مطالعے کے فروغ اور علمی مباحث کو ادارہ جاتی سطح پر جاری رکھنے کی ضرورت پر زور دیا ۔ ان کے علاوہ جمشید علی خان ، سلمان غنی ، سلیم منصور خالد ، ڈاکٹر فرید احمد پراچہ ، ڈاکٹر حسین احمد پراچہ اور پروفیسر ڈاکٹر خالد محمود نے بھی مصنف اور کتاب کے بارے میں اپنے خیالات پیش کیے ۔
نشست کے اختتام پر ڈاکٹر نوید الہیٰ ، ڈین NIPP، نے ریکٹر ، معزز مہمانانِ گرامی اور شرکاء کا شکریہ ادا کیا ۔ انہوں نے کہا کہ NIPP علمی و فکری مکالمے کو فروغ دینے اور پالیسی ، حکمرانی اور ثقافت کے درمیان تعلق کو مزید مضبوط بنانے کیلیے پر عزم ہے ۔
اس تقریب میں NSPP کے مختلف شعبہ جات کے ممبرز ، افسران اور شرکاء کی بڑی تعداد نے شرکت کی اور یہ ایک یادگار و با معنی ادبی نشست ثابت ہوئی ۔
