ہر قدم دوریِ منزل ہے نمایاں مجھ سے
ہر قدم دوریِ منزل ہے نمایاں مجھ سے
مری رفتار سے بھاگے ہے، بیاباں مجھ سے
درسِ عنوانِ تماشا، بہ تغافلِ خوشتر
ہے نگہ رشتۂ شیرازۂ مژگاں مجھ سے
وحشتِ آتشِ دل سے، شبِ تنہائی میں
صورتِ دُود، رہا سایہ گُریزاں مجھ سے
غمِ عشاق نہ ہو، سادگی آموزِ بُتاں
کِس قدر خانۂ آئینہ ہے ویراں مجھ سے
اثرِ آبلہ سے، جادۂ صحرائے جنوں
صورتِ رشتۂ گوہر ہے چراغاں مجھ سے
بیخودی بسترِ تمہیدِ فراغت ہو جو
پُر ہے سائے کی طرح، میرا شبستاں مجھ سے
شوقِ دیدار میں، گر تو مجھے گردن مارے
ہو نگہ، مثلِ گلِ شمع، پریشاں مجھ سے
بیکسی ہائے شبِ ہجر کی وحشت، ہے ہے!
سایہ خورشیدِ قیامت میں ہے پنہاں مجھ سے
گردشِ ساغرِ صد جلوۂ رنگیں، تجھ سے
آئینہ داریِ یک دیدۂ حیراں، مُجھ سے
نگہِ گرم سے ایک آگ ٹپکتی ہے، اسدؔ!
ہے چراغاں، خس و خاشاکِ گُلستاں مجھ سے
شاعر: مرزا غالب
Har Qadam Doori e Manzill Hay Numayaan Mujh Say
Miri Raftaar Say Bhaagay Hay Bayabaan Mujh Say
Dars e Unwasan e Tamaasha Ba Taghaaful Khoshtar
hay Nigah Rishta e Shiraaza e Mizzgaan Mujh Say
Wehshat Aatish e Dil Say Shab e Tanhaai Men
Soorat e Dood Raha Saaya e Gurezaan Mujh Say
Ghame Ushhaaq Na Ho Saadgi Aamooz e Butaan
Kiss Qadar Khaana e Aaina Hay Weraan Mujh Say
Asar Aabla Say Jaada e Sehra Ay Junoon
Soorat e Rishta Gohar Hay Charaghaan Mujh Say
Bekhuddi Basta e Tamheed e Faraaghat Ho Jo
Pur Hay Saaey Ki Tarah Mera Shabistaan Mujh Say
Shoq e Dedaar Men Gar Tu Mujh Ko Gardan Maaray
Ho Nigah Misl e Gull e Shama Pareshaan Mujh Say
Bekasi Haa e Shab e Hijr ki Wehshat Hay Hay
Saaya Khursheed e Qayamat Men Hay Pinhaan Mujh Say
Gardash e Saaghir e Sad Jalwa e Rangeen Tujh Say
Aaina Daari e yak Deeda e hairaan Mujh Say
Nigah Garm Say Ik Aag Tapakti Hay ASAD
Hay Charaghaan , Khas o Khashaak e Gulistaan Mujh Say
Pot: Mirza Ghalib