16انجنوں کے انڈر فریم میں دراڑیں ، ریلوے کا چین سے نئے فریم دینے کا مطالبہ

16انجنوں کے انڈر فریم میں دراڑیں ، ریلوے کا چین سے نئے فریم دینے کا مطالبہ

  

 لاہور(خبر نگار خصوصی) پاکستان ریلویز نے چین سے خریدے گئے تمام لوکوموٹیوز کے انڈر فریم کا ڈیزائن تبدیل کر کے نئے انڈر فریم فراہم کرنے کا مطالبہ کیا ہے۔ گزشتہ روزنیو لوکو ڈیزل شیڈ میں وزیر ریلوے خواجہ سعد رفیق کی زیر صدارت پاکستانی اور چینی انجینئر کا طویل مشاورتی اجلاس ہوا، جس میں چیف ایگزیکٹو آفیسر محمد جاوید انور ، جنرل منیجر مینوفیکچرنگ اینڈ سروسز اسد احسان، ایڈیشنل جنرل منیجر مکینکل لیاقت چغتائی، چیف مکینیکل انجینئرلوکوکیپٹن (ر) مجید بیگ سمیت دیگر سینئر مکینکل حکام نے شرکت کی۔قبل ازیں وزیر ریلوے خواجہ سعد رفیق نے چیف ایگزیکٹو آفیسر محمد جاوید انور اور مکینکل انجینئرز کے ہمراہ چینی انجینئرز کی آمد سے قبل چینی انجنوں کا مفصل معائنہ کیا۔ چینی لوکوموٹیوز کے انڈر فریم میں پائی جانے والی خرابی کے بعد چینی لوکوموٹیوز کمپنی CSR ZIYANG کے انجینئرگزشتہ شب ہنگامی طور پر لاہور پہنچے تھے۔چین سے خریدے گئے 2000ہارس پاور کے 16لوکوموٹیوز کے انڈر فریم میں کریک پائے گئے۔ پاکستان ریلویز نے چینی انجینئرز کو 48گھنٹوں میں ان نقائص کا مستقل حل دینے کی ہدایت کی، جسے چینی انجینئرز نے قبول کر لیا۔ 6لوکو موٹیوز کے انڈر فریم تبدیل کرنے کے لیے میٹریل اور ٹیکنیشین 14فروری کو لاہور پہنچ جائیں گے۔ جبکہ جمعہ 12فروری تک چینی اور پاکستانی انجینئرز نقائص دور کرنے کے لیے حتمی حل پیش کردیں گے۔ پاکستان ریلویز نے لوکوموٹیوز کو کم سے کم وقت میں مرمت کرنے کا مطالبہ کیا ہے۔

مزید :

علاقائی -