پی ایس ایل اہم ایونٹ،ترقیاتی کاموں کو تیز کیاجائے :وزیر اعلیٰ سندھ

پی ایس ایل اہم ایونٹ،ترقیاتی کاموں کو تیز کیاجائے :وزیر اعلیٰ سندھ

  

کراچی(اسٹاف رپورٹر)پاکستان سپر لیگ(پی ایس ایل) کے حوالے سے آئی جی سندھ نے وزیر اعلی سندھ مراد علی شاہ کو بریفنگ دیتے ہوئے بتایا کہ سندھ پولیس نے لاہور کا دورہ کیا جس میں پاکستان و سری لنکا میچ اکتوبر 2017 کے سیکیورٹی انتظامات کا جائزہ لیا ہے جبکہ تمام اسٹیک ہولڈرز میں قریبی تعاون کیا گیا ہے۔تفصیلات کے مطابق وزیر اعلی سندھ سید مراد علی شاہ نے سیکیورٹی انتظامات کے حوالے سے آئی جی سندھ سے بریفنگ کے موقع پر احکامات دیتے ہوئے کہا کہ پاکستان سپر لیگ ایونٹ ہمارے عوام کے لیے ہے اور اس ایونٹ سے کسی کو پریشانی نہیں ہونی چاہیئے۔ اسٹیڈیم کے اطراف جاری ترقیاتی کاموں کو تیز کیا جائے۔انہوں نے کہا کہ ٹریفک کے متبادل راستے بھی پہلے عوام کو بتا دیے جائیں۔ ٹریفک پولیس اپنا زبردست بندوبست کرے۔آئی جی پولیس سندھ نے اس موقع پر بریفنگ دیتے ہوئے کہا کہ میچ سے 5 روز قبل پارکنگ ایریاز، اسٹیڈیم کھول دیے جائیں گے۔ آج ابتدائی ریہرسل کی جارہی ہے۔ ریہرسل میں وی وی آئی پی موومنٹ، کھلاڑیوں کی آمد، سیکیورٹی انتظامات و دیگر ہر قسم کی موومنٹ کور کی جارہی ہے۔بریفنگ کے مطابق اسٹڈیم میں 33 ہزار لوگوں کی گنجائش ہے جس کو دیکھتے ہوئے پارکنگ و دیگر انتظامات کا بندوبست کیا جارہا ہے۔ترجمان وزیر اعلی سندھ نے اس موقع پر بتایا کہ وزیر اعلی سندھ نے 4 کمیٹیز تشکیل دے دی ہیں جن میں ایگزیکٹو کمیٹی میں چیف سیکریٹری، سول کمیٹی میں وزیر بلدیات و میئر کراچی و دیگر، انٹیلی جنس کمیٹی میں خفیہ اداروں کے حکام شامل اور سیکیورٹی کمیٹی میں پولیس و رینجرز کے حکام شامل ہیں۔وزیر اعلی سندھ نے سیکرٹری صحت کو ہدایت بھی جاری کی ہیں کہ اسٹیڈیم کے قریب آغا خان و لیاقت نیشنل اسپتال ہیں، ان کی انتظامیہ سے بات چیت کر کے الرٹ رکھا جائے۔ کسی ناگہانی صورتحال پر ان قریبی اسپتالوں کی خدمات لی جاسکتی ہیں۔وزیر اعلی سندھ نے کہا کہ ہم نے اپنا وعدہ پورا کیا اب ہم سب کو اس ایونٹ کو کامیاب بنانا ہے۔

مزید :

تجزیہ -کراچی صفحہ اول -