سعودی عرب میں عالیشان ”جشنِ پاکستان عالمی مشاعرہ “کا انعقاد
ریاض (وقار نسیم وامق) سعودی عرب کے دارالحکومت ریاض میں شعر و ادب کے شائقین کے لیے ایک خوبصورت اور یادگار ادبی شام منعقد ہوئی جس میں سفارت خانہ پاکستان کے افسران، پی آئی اے ریاض کے ذمہ داران، پاکستانی اسکولز کے اساتذہ، طلباء و طالبات، عمائدین ریاض سمیت خواتین و حضرات کی ایک بہت بڑی تعداد موجود تھی۔
"جشنِ پاکستان عالمی مشاعرہ" کے عنوان سے اس عالیشان مشاعرہ کا اہتمام حلقۂ فکر و فن اور پاک میڈیا فورم کے اشتراک سے کیا گیا۔ یہ محفلِ شعر و سخن پاکستان سے محبت، اردو زبان کی ترویج، اور ادبی ذوق کی تسکین کے لیے ایک مثالی تقریب ثابت ہوئی۔
اس شاندار مشاعرے کے مہمانِ خصوصی نامور شاعر علی زریون تھے، جن کی شاعری ہمیشہ سننے والوں پر سحر طاری کر دیتی ہے۔ دیگر معزز مہمان شعراء کرام میں نامور مزاح گو شاعر احمد سعید، معروف پنجابی شاعرہ طاہرہ سرا، نوجوان ابھرتی ہوئی شاعرہ ماہِ نو شامل تھے، جنہوں نے اپنے خوبصورت کلام سے محفل کو چار چاند لگا دیے۔ اس کے علاوہ سید طیّب رضا کاظمی، آفتاب ترابی، غزالہ کامرانی، مسعود جمال اور کامران حسانی جیسے ممتاز میزبان شعراء نے اپنی منفرد شاعری سے سامعین کو مسحور کیا جبکہ دیگر شعراء کرام میں وسیم ساحر، ضواق علی ذکی، حمزہ قیس اور ظفر اقبال خان شامل تھے۔
جشنِ پاکستان عالمی مشاعرہ کی صدارت عالمی حلقہء فکروفن کے مرکزی صدر اور معروف شاعر وقار نسیم وامق نے نہایت ذمہ داری سے سرانجام دئیے جبکہ نظامت کے فرائض نامور شاعر آفتاب ترابی نے بخوبی سرانجام دئیے، آفتاب ترابی نے اپنی منظوم نظامت سے خوب داد و تحسین حاصل کی۔
مشاعرہ کے مہمان شعراء کرام کو منتظمین اور پی آئی اے کی جانب سے یادگاری شیلڈز جبکہ اہلِ ریاض کی جان سے تحائف پیش کئے گئے جبکہ اس موقع پر مشاعرہ کے مرکزی سپانسرز کو بھی یادگاری شیلڈز پیش کی گئیں۔
مشاعرہ سے قبل صدر پاک میڈیا فورم ذکاء اللہ محسن، چیئرمین الیاس رحیم اور وائس چیئرمین حلقہء فکروفن عدنان اقبال بٹ نے مشاعرہ کے شرکاء سے خطاب کیا جبکہ تقریب کا باقاعدہ آغاز تلاوتِ قرآن پاک سے ہوا، ہدیہء نعتٌ قلبِ عباس نے پیش کیا، اس موقع پر پاکستان اور سعودی عرب کے قومی ترانے پیش کئے گئے، تقریب کے پہلے حصہ کی نظامت کے فرائض ڈپٹی سیکرٹری جنرل حلقہء فکروفن کامران حسانی نے بخوبی سرانجام دئیے۔
اس موقع پر مشاعرہ میں شریک افراد کا کہنا تھا کہ عالمی حلقہء فکروفن اور پاک میڈیا فورم کے زیراہتمام تاریخی جشنِ پاکستان عالمی مشاعرہ بلاشبہ اردو ادب، حب الوطنی اور ثقافتی ورثے کا بہترین امتزاج تھا جس میں پاکستان کے نمائندہ عالمی سطح کے شعراء نے شرکت کی اور اپنے کلام سے سامعین کے دل جیت لئے اور یہ مشاعرہ ہمیشہ یادگار رہے گا۔
