آج کنڈیشنز تھوڑی مختلف تھیں لیکن ہم نے زبردست کھیل پیش کیا، پلئیر آف دی میچ کین ولیمسن کی گفتگو

لاہور (ڈیلی پاکستان آن لائن) نیوزی لینڈ کے کپتان کین ولیمسن نے جنوبی افریقہ کے خلاف شاندار سنچری سکور کرنے کے بعد ٹیم کی مجموعی کارکردگی کو سراہا اور میچ کے بہترین کھلاڑی کا ایوارڈ حاصل کیا۔

میچ کے بعد گفتگو کرتے ہوئے ولیمسن نے کہا آج کنڈیشنز تھوڑی مختلف تھیں لیکن ہم نے زبردست کھیل پیش کیا، جنوبی افریقہ کے بریٹزکے نے شاندار سنچری سکور کی اور ہمیں ہدف حاصل کرنے کے لیے محنت کرنا پڑی۔انہوں نے مزید کہا کہ ٹیم کو اب چند دن کا آرام ملے گا کیونکہ وہ مختلف وینیوز پر میچز کھیل رہے ہیں۔ ولیمسن نے کہا گزشتہ میچ ڈے نائٹ تھا اور یہ دن کا میچ تھا، جس سے کنڈیشنز میں فرق آیا۔ گلین فلپس مجھ سے زیادہ طاقتور ہے، اس لیے ہمیں مختلف انداز اپنانا پڑا۔

ان کا کہنا تھا کہ ایسے بڑے ہدف کے تعاقب میں شراکت داری بہت ضروری ہوتی ہے اور یہ مجموعی طور پر ایک زبردست ٹیم ورک تھا، ہم کنڈیشنز سے زیادہ سے زیادہ مطابقت پیدا کرنے کی کوشش کر رہے ہیں۔یاد رہے کہ نیوزی لینڈ نے 305 رنز کے ہدف کا تعاقب 48.4 اوورز میں 6 وکٹوں سے کامیابی کے ساتھ مکمل کیا، جس میں ولیمسن کے ناقابلِ شکست 133 رنز شامل تھے۔