پنجاب اوورسیز پاکستانی کمیشن کی تاریخ میں پہلی مرتبہ ای ۔کچہری کا انعقاد ، بیرسٹر امجد ملک نے بیرون ممالک مقیم پاکستانیوں کے مسائل سنے
لاہور (ڈیلی پاکستان آن لائن) اوورسیز پاکستانی کمیشن پنجاب نے اپنی تاریخ میں پہلی بار ای-کچہری کا انعقاد کیا، جس کا مقصد بیرون ملک مقیم پاکستانیوں کے مسائل براہ راست سننا اور فوری حل فراہم کرنا تھا۔ وائس چیئرپرسن او پی سی پنجاب، بیرسٹر امجد ملک نے امریکہ، کینیڈا، سعودی عرب، متحدہ عرب امارات، اٹلی، جنوبی افریقہ سمیت دیگر ممالک میں مقیم پاکستانیوں کے مسائل سنے اور ان کے فوری حل کے لیے موقع پر متعلقہ افسران کو ہدایات جاری کیں۔
اس موقع پر بیرسٹر امجد ملک نے کہا کہ سمندر پار پاکستانی ہمارا قیمتی اثاثہ ہیں، اور ان کے مسائل کا حل میری اولین ترجیح ہے۔انہوں نے یقین دلایا کہ اوورسیز پاکستانیوں کی فلاح و بہبود کے لیے حکومت انقلابی اقدامات کر رہی ہے اور پنجاب اوورسیز پاکستانی کمیشن کے دروازے ہر وقت ان کے لیے کھلے ہیں۔ حکومت کی کوشش ہے کہ او پی سی کو ایک مؤثر ون ونڈو آپریشن میں تبدیل کیا جائے، جہاں نہ صرف شکایات کا فوری ازالہ ہو بلکہ دیگر سہولیات بھی فراہم کی جائیں۔ جلد ہی ضلع کی سطح پر تمام کمیٹیاں مکمل طور پر فعال کر دی جائیں گی تاکہ اوورسیز پاکستانیوں کے مسائل مقامی سطح پر حل کیے جا سکیں۔
انہوں نے اس بات پر بھی زور دیا کہ اوورسیز پاکستانی ملک کی معیشت اور ترقی میں کلیدی کردار ادا کرتے ہیں،اور ان کے مسائل کا فوری حل حکومت کی ترجیحات میں شامل ہے۔ ای-کچہری کے دوران او پی سی کے اعلیٰ افسران بھی موجود تھےاور مسائل کے حل کے لیے تمام متعلقہ محکموں کو فعال کردار ادا کرنے کی ہدایات دی گئیں۔
