پاکستانی عوام کو عالمی منڈی میں تیل سستا ہونے کا فائدہ نہیں مل رہا،میاں مقصود

پاکستانی عوام کو عالمی منڈی میں تیل سستا ہونے کا فائدہ نہیں مل رہا،میاں ...

  

لاہور(نمائندہ خصوصی)امیرجماعت اسلامی پنجاب میاں مقصود احمد اور سیکرٹری جنرل بلال قدرت بٹ نے کہا ہے کہ2003سے لے کر اب تک تیل کے نرخ عالمی مارکیٹ میں سب سے کم ہوچکے ہیں جبکہ ان میں مسلسل کمی کارجحان جاری ہے مگر جہاں امریکہ سمیت دنیابھر کے ممالک ان کافائدہ اپنے عوام کوپہنچارہے ہیں وہاں پاکستان میں تاحال نرخ پرانے ہی وصول کرکے عوام کو دونوں ہاتھوں سے لوٹا جارہا ہے جس کی جتنی بھی مذمت کی جائے کم ہے۔یہاں تک کہ ہندوستان میں بھی گزشتہ چند ماہ کے دوران7بار پٹرولیم مصنوعات کے نرخوں میں کمی کی گئی ہے۔انہوں نے کہاکہ پاکستان میں اس وقت ایک لیٹر پٹرول پرتقریباً50روپے تک کے مختلف ٹیکس عائد ہیں جوکہ خالصتاً حکومت کامنافع ہے کیونکہ ان کے ذریعے حکومت کو فوری طور پرمنافع مل جاتا ہے اس لئے وہ پٹرولیم مصنوعات کی قیمتوں میں کمی نہیں کررہی۔ایک طرف تو حکومت ٹیکس ایمنسٹی جیسی اسکیمیں لارہی ہے تو دوسری جانب غریب عوام کو جائز ریلیف بھی فراہم کرنے سے گریزاں ہے۔انہوں نے کہاکہ وزیر اعظم اس سارے معاملے کانوٹس لیتے ہوئے عوام کے ساتھ دوستی نبھائیں اور عالمی مارکیٹ میں کمی کے تناسب سے ملک میں بھی پٹرولیم مصنوعات کے نرخوں کوکم کیاجائے تاکہ مہنگائی کی چکی میں پسے عوام کو کچھ ریلیف مل سکے۔جماعت اسلامی کے رہنماؤں نے مزیدکہاکہ ملک عاقبت نااندیش فیصلوں کی بدولت مسائلستان بن چکا ہے۔آئے روز نئے سے نئے بحران جنم لے رہے ہیں کرپشن کی داستانیں زبان زدعام ہیں۔

مزید :

میٹروپولیٹن 1 -