پیپلز پارٹی سے اتحاد نا منظور،پی ٹی آئی میں مخالفت کا سونامی آ گیا
لاہور(نمائندہ خصوصی) چیئرمین تحریک انصاف عمران خان کی جانب سے اپوزیشن کے گرینڈ الائنس کی تشکیل کیلئے پاکستان پیپلز پارٹی کو ساتھ ملانے کی پی ٹی آئی کی سینئرلیڈر شپ نے شدید مخالفت کردی ہے دوسری جانب پیپلز پارٹی کی بھی سینئر لیڈر شپ نے پی ٹی آئی کو ایک یوٹرن والی جماعت قرار دیتے ہوئے ان کے ساتھ گرینڈ الائنس میں چلنے کی مخالفت کردی ہے اور کہا ہے کہ اس وقت ہمیں پی ٹی آئی کا ساتھ دینے کی بجائے تنہا احتجاجی تحریک چلانی چاہئے ۔دونوں جماعتوں کے اندرونی ذرائع نے ’پاکستان‘‘ کو بتایا ہے کہ عمران خان اور ان کی سینئر لیڈر شپ صرف بلاول بھٹو کے ساتھ ملکر احتجاجی تحریک چلانے کے لئے تو تیار ہے لیکن سابق صدر مملکت آصف علی زرداری کے ساتھ ملکر احتجاجی تحریک چلانے کی مخالف ہے ۔اسی طرح سے پیپلز پارٹی کی بھی سینئر لیڈر شپ کا کہنا ہے کہ بار بار یو ٹرن لیکر عمران خان پھنس چکے ہیں اس لئے ہمیں ان کا ساتھ دینے کے بجائے تنہا اپنے ایجنڈے کے مطابق احتجاجی تحریک چلانی چاہئے۔
