پارٹی پالیسی کے خلاف آرمی ایکٹ ترمیمی بل کی حمایت پر سینیٹر اشوک کمار کو مہنگی پڑگئی، پارٹی رکنیت سے ہی ہاتھ دھونا پڑ گئے
کراچی (ویب ڈیسک) آرمی چیف کی مدت ملازمت میں توسیع کے حوالے سے پیش کیے جانے والے بل سے متعلق پارٹی پالیسی کی خلاف ورزی پر سینیٹر اشوک کمار کی رکنیت ختم کردی گئی۔نیشنل پارٹی کے مرکزی صدر ڈاکٹرعبدالمالک بلوچ نے پارٹی پالیسیوں کی خلاف ورزی پر سینیٹر ڈاکٹر اشوک کمار کی پارٹی رکنیت ختم کردی۔پارٹی کے رکن سینیٹر ڈاکٹر اشوک کمار نے پارٹی پالیسیوں کی خلاف ورزی کرتے ہوئے آرمی ایکٹ میں ترمیم کے حق میں ووٹ دیا تھا۔ترجمان نیشنل پارٹی کے مطابق نیشنل پارٹی نے سینیٹ و قومی اسمبلی میں پیش ہونے والے آرمی سروسز ایکٹ ترمیمی بلز 2020 کی مخالفت میں ووٹ دینے کا فیصلہ کیا تھا لیکن پارٹی کے رکن سینیٹر ڈاکٹر اشوک کمار نے پارٹی پالیسیوں کی خلاف ورزی کرتے ہوئے آرمی ایکٹ میں ترمیم کے حق میں ووٹ دے کر پارٹی کی بنیادی سیاسی فکر و فلسفے کی نفی کردی۔ترجمان نیشنل پارٹی کے مطابق ڈاکٹر اشوک کمار کی سینیٹ میں رکنیت کو ختم کرنے کیلئے الیکشن کمیشن کو ریفرنس جلد بھیجا جائے گا۔