کورونا کے وار جاری ، اموات کی تعداد 5 ہزار سے بڑھ گئی ، متاثرہ افراد میں بھی اضافہ
اسلام آباد (ڈیلی پاکستان آن لائن )پاکستان میں گزشتہ چوبیس گھنٹوں میں کورونا وائرس کے مزید 2751 کیسز سامنے آ گئے ہیں جبکہ 75 افراد جان کی بازی ہار گئے ۔ لاہور سمیت پنجاب کے سات شہروں کے مختلف علاقوں میں سمارٹ لاک ڈاﺅن لگا دیاگیا ہے جو کہ 24 جولائی تک جاری رہے گا۔
تفصیلات کے مطابق گزشتہ چوبیس گھنٹوں میں پاکستان بھر میں 23 ہزار 255 ٹیسٹ کیے گئے جن میں مزید 2751 افراد میں وائرس کی تصدیق ہوئی ہے جس کے بعد متاثرہ افراد کی مجموعی تعداد دو لاکھ 43 ہزار 499 ہو گئی ہے جن میں سے ایک لاکھ 49 ہزار 92 افراد صحت یاب ہو چکے ہیں ۔گزشتہ چوبیس گھنٹوں میں ملک بھر میں 75 اموات بھی ہوئیں ہیں جس کے بعد جاں بحق ہونے والے کی تعداد پانچ ہزار سے تجاوز کر گئی ہے اور اس وقت 5 ہزار 58 تک پہنچ گئی ہے ۔حکومت کی جانب سے 2375 افراد کی حالت تشویشناک بتائی جارہی ہے ۔
سب سے زیادہ کیسز
کورونا وائرس کے سب سے زیادہ کیسز اب تک سندھ میں سامنے آ چکے ہیں جہاں تعداد ایک لاکھ تجاوز کر گئی ہے ، سندھ میں ایک لاکھ 900 افراد میں وائرس کی تشخیص ہو چکی ہے ، پنجاب میں 85 ہزار 261، بلوچستان میں 11 ہزار 99، کے پی کے میں 29 ہزار 406، اسلام آباد میں 13 ہزار 829، آزاد کشمیر میں 1485 اور گلگت بلتستان میں 1619 افراد میں وائرس کی تشخیص ہو چکی ہے ۔
اموات
گزشتہ چوبیس گھنٹوں میں 75 افراد جان کی بازی ہار چکے ہیں جس کے بعد اموات کی مجموعی تعداد پانچ ہزار 58 ہو گئی ہے ۔ کورونا وائرس کے باعث سب سے زیادہ اموات پنجاب میں ہو ئیں ہیں جہاں تعداد 1972 ہو گئی ہے جبکہ سندھ میں 1677، کے پی کے میں 1063، اسلام آباد میں 146، گلگت بلتستان میں 34، بلوچستان میں 125اور آزاد کشمیر میں 41 افراد جان کی بازی ہار چکے ہیں ۔
صحت یاب ہونے والے افراد
کورونا وائرس سے اب تک ایک لاکھ 49 ہزار 92 افراد صحت یاب ہو چکے ہیں جن میں بڑی تعداد کا تعلق سندھ ہے ، سندھ میں اب تک 57 ہزار 627 افراد صحت یاب ہونے کے بعد گھروں کو لوٹ گئے ہیں جبکہ پنجاب میں 52 ہزار 641، کے پی کے میں 19 ہزار 503، اسلام آباد میں 10 ہزار 240، گلگت بلتستان میں 1290، بلوچستان میں 6931 اور آزاد کشمیر میں 860 افراد صحت یاب ہو چکے ہیں ۔