گرانفروشوں کیخلاف کارروائیاں‘ 27 افراد جیل منتقل
پشاور(سٹی رپورٹر) محکمہ خوراک نے گرانفروشی پر مزید 27 افراد کو جیل منتقل کردیا۔ سیکرٹری محکمہ خوراک عابد خان وزیر اور ڈائریکٹر فوڈ یاسر حسن کی ہدایت پر راشننگ فوڈ کنٹرولر پشاور جمشید آفریدی کی نگرانی میں اسسٹنٹ فوڈ کنٹرولرز تسبیح اللہ اور کمال احمد نے تاج آباد‘ بنوں ہاؤس‘ فتو عبد الرحیمہ اور پخہ غلام میں فوڈ پوائنٹس میں اشیائے خوردونوش کے معیار کو چیک کیا اور نرخوں بارے آگاہی حاصل کی۔ کم وزن روٹی فروخت کرنے اور دودھ 220 روپے فی کلو فروخت کرنے پر 27 افراد کو جیل منتقل کردیا گیا جن کے خلاف فوڈ ایکٹ کے تحت کارروائی عمل میں لائی جائیگی۔ راشننگ فوڈ کنٹرولر پشاور جمشید آفریدی نے میڈیا سے بات چیت کرتے ہوئے کہا کہ گرانفروشی کے مرتکب افراد کسی رعایت کے مستحق نہیں ہیں۔ انہوں نے کہا کہ فوڈ پوائنٹس مالکان سرکاری نرخناموں پر عملدرآمد یقینی بنائیں بصورت دیگر سخت قانونی کارروائی عمل میں لائی جائیگی۔ انہوں نے محکمہ خوراک کے افسران کو ہدایت کی کہ وہ روزانہ کی بنیاد پر گرانفروشوں کے خلاف کارروائیاں عمل میں لائیں اور اس سلسلے میں کسی کیساتھ کوئی نرمی نہ برتی جائے۔
