تیونس کے قریب تارکین وطن کی3 کشتیاں ڈوب گئیں، 5 ہلاک، متعدد لاپتہ

  تیونس (آئی ا ین پی ) تیونس کے قریب سمندر میں تارکین وطن کی3 کشتیاں ڈوب گئی ہیں جس کے نتیجے میں5افراد ہلاک جبکہ متعدد لاپتہ ہو گئے جن کو ڈھونڈنے کی کوشش کی جا رہی ہے۔

تیونس کے ایک کوسٹ گارڈ کا کہنا ہے کہ امدادی ٹیم کو جن 5افراد کی لاشیں ملی ہیں ان میں ایک بچہ بھی شامل ہے۔ ان کا کہنا تھا کہ کشتیاں ڈوبنے کے واقعات ایسفیکس شہر کے قریب پیش آئے۔ ایسفیکس کے پراسیکیوٹر فازی مسودی کا کہنا ہے کہ افریقہ سے اٹلی کی طرف جانے والی تینوں کشتیوں میں گنجائش سے زیادہ لوگ سوار تھے۔ ان کا کہنا تھا کہ ڈوبنے والی کشتیوں کے ٹکڑے بھی امدادی ٹیموں کو ملے ہیں۔

ان کے مطابق امدادی کارکنوں نے 73 افراد کو بچا لیا ہے جبکہ 47 کے قریب افراد ابھی تک لاپتہ ہیں۔ ان کا یہ بھی کہنا تھا کہ لاپتہ ہونے والے افراد میں 6بچے بھی شامل ہیں۔ کشتیوں کے بارے میں ان کا کہنا تھا کہ وہ زیادہ تر لوہے کی بنی ہوئی تھیں۔