عوام سے من و سلویٰ کے وعدے کر کے ایک وقت کی دال روٹی تک چھین لی گئی، سراج الحق
لاہور (ڈیلی پاکستان آن لائن) امیر جماعت اسلامی سراج الحق نے کہا ہے کہ پی ڈی ایم، پیپلزپارٹی اور پی ٹی آئی نے عوام سے من و سلویٰ کے وعدے کر کے ایک وقت کی دال روٹی تک چھین لی، حکمران ٹرائیکا کی ناکامی اور نااہلی پوری قوم پر عیاں ہو گئی، تینوں کا عرصہ اقتدار تعمیر کی بجائے تخریب میں صرف ہوا۔ آج معیشت دیوالیہ، ادارے کمزور اور ملک مہنگائی کے ساتھ ساتھ بدامنی کی لپیٹ میں بھی ہے، حالات کی ذمہ دار حکمران جماعتیں ہیں۔ تینوں نے پارلیمنٹ کو کھلونابنایا، آئین اور قانون کا مذاق اڑایا۔ ان خیالات کا اظہار انہوں نے منصورہ میں مختلف وفود سے گفتگو کرتے ہوئے کیا۔ امیر جماعت آج کوئٹہ روانہ ہوں گے جہاں وہ ”گوادر کو حق دو“ تحریک کے رہنما مولانا ہدایت الرحمان اور ان کے ساتھیوں کی رہائی اور گوادر کے مقامی رہائشیوں کے حقوق کے لیے صوبائی دارالحکومت میں احتجاجی دھرنے میں شرکت اور خطاب کریں گے۔
سراج الحق کا مزید کہنا تھا کہ آج عدلیہ، الیکشن کمیشن اور نیب پر عوام کا اعتماد ختم ہو گیا، اسٹیبلشمنٹ کے بارے میں ہر جلسے میں باتیں ہوتی ہیں، صرف عوام کا ادارہ بچا ہے جس سے فیصلہ لینا ہو گا۔
انہوں نے کہا کہ جماعت اسلامی کا موقف ہے کہ استحکام کی خاطر پورے ملک میں بیک وقت انتخابات ضروری ہیں۔ مرکز اور صوبے کی اسمبلیاں قائم رہیں تودو صوبوں کے الیکشن پر اثر پڑے گا، اسی طرح انتخابات کے بعد دو صوبوں کی حکومتیں آئندہ نصف الیکشن پر اثرانداز ہو سکتی ہیں۔ قومی خزانہ بھی اس قابل نہیں کہ الگ الگ انتخابات کا بوجھ برداشت کر سکے۔
