ملک کی 24فیصد آبادی ذہنی صحت کے کسی نہ کسی مسئلے میں مبتلا ، صدر مملکت
اسلام آباد(آن لائن) صدر مملکت ڈاکٹر عارف علوی کی زیرِ صدارت ایوانِ صدر میں ذہنی صحت کے حوالے سے اجلاس ہوا ۔اجلاس میں وزیراعظم اسٹریٹجک ریفارمز یونٹ کے سربراہ سلمان صوفی اور ماہرین نفسیات کی بذریعہ ویڈیو لنک شرکت کی۔اجلاس کے شرکا نے دماغی صحت کے مسائل میں مبتلا لوگوں کو خدمات فراہم کرنے کے لیے ایک باہمی نگہداشت کے ماڈل کی ضرورت پر زور دیا۔صدر مملکت نے کہا کہ دماغی صحت بڑا چیلنج ہے، ملکی ذہنی صحت کی ضروریات پورا کرنے کیلئے مربوط نقطہ نظر کی ضرورت ہے،ملک کی 24 فیصد آبادی ذہنی صحت کے کسی نہ کسی مسئلے میں مبتلا ہے ، ذہنی صحت کے حوالے سے حکومت، ماہرین صحت، سول سوسائٹی کی تنظیموں اور میڈیا کو فوری توجہ دینے کی ضرورت ہے، سلمان صوفی نے وزیر اعظم سیکرٹریٹ کی جانب سے دماغی صحت کی خدمات تک رسائی کے لیے ہمراز پلیٹ فارم اور مینٹل ہیلتھ ہیلپ لائن کے بارے میں آگاہ کیا کہ دماغی صحت کے مسائل میں مبتلا افراد کو متعلقہ ذہنی صحت کی خدمات اور مشاورت فراہم کرنے کے لیے ابھی تک 140 ماہر نفسیات رجسٹرڈ ہو چکے ہیں ،صدر مملکت نے ذہنی صحت کے حوالے سے این جی اوز اور تسکین ہیلتھ انیشیٹو کی کوششوں کو بھی سراہا ۔عالمی ادارہ صحت نے حکومت کی طرف سے کی جانے والی کوششوں کی تعریف کی ، اقدام کی حمایت کا اظہار کیا۔صدر مملکت نے وزیر اعظم کی طرف سے دماغی صحت اور تندرستی کے حوالے سے اٹھائے گئے اقدام کو سراہا۔
عارف علوی
