گورنر خیبر پختونخوا نے اگلے ہفتے ملاقات کی خواہش کا اظہار کیا ہے، پنجاب، کے پی انتخابات، 20ارب درکار، حکومت نے صرف5ارب دیئے، الیکشن کمیشن
اسلام آباد (مانیٹرنگ ڈیسک) چیف الیکشن کمشنر کی زیر صدارت ہونیوالے اہم اجلاس کا اعلامیہ جاری کر دیا گیا،الیکشن کمیشن کے جاری کردہ اعلامیہ کے مطابق اجلا س میں سیکرٹری داخلہ اور خزانہ کو سکیورٹی اور فنڈز کی فراہمی یقینی بنانے کیلئے بلایا گیا تھا، الیکشن کمیشن نے سیکرٹری خزانہ کو بتایا پورے ملک میں عام انتخابات کیلئے 65 ارب روپے درکار ہونگے، دونوں صوبوں میں انتخابات کیلئے 20 ارب درکار ہیں جس میں سے صرف 5 ارب روپے دئیے گئے ہیں۔اعلامیہ کے مطابق الیکشن کمیشن نے مزید کہا رواں مالی سال میں مزید 15ارب روپے کی ضرورت ہے، جس پر سیکرٹری خزانہ نے بتایا مطلوبہ فنڈز مہیا کرنا وزرات کیلئے مشکل ہو گا، فنڈز کے سلسلے میں وفاقی حکومت سے مشاورت کرنے کے بعد حتمی جواب دینگے۔ الیکشن کمیشن نے سیکرٹری داخلہ سے کہا کہ پنجاب میں پولیس فورس کے علاوہ 2 لاکھ 97 ہزار دیگر ادا روں کی نفری درکار ہو گی، خیبرپختوانخوا میں پولیس کے علاوہ 56 ہزار مزید نفری چاہئے، آپ فوج، رینجرز اور دیگر قانون نافذ کرنیوالے ادا روں سے رابطہ کریں اور مطلوبہ درکار نفری کا بندوبست کر کے ہمیں آگاہ کریں۔الیکشن کمیشن کے جاری کردہ اعلامیہ کے مطابق آئی بی، آئی ایس آئی اور دونوں صوبوں کی سی ٹی ڈیز سے بھی آج میٹنگ کی جائے گی، دونوں صوبوں کے چیف سیکرٹریز اور آئی جیز کو اگلے ہفتے میٹنگ کیلئے بلایا ہے، انتخابی انتظامات کو حتمی شکل دینے کیلئے وزرات دفاع سے بھی میٹنگ کی جائے گی، گورنر خیبرپختوانخوا نے اگلے ہفتے ملاقات کی خواہش کا اظہار کیا ہے۔
الیکشن کمیشن
