11 بلدیاتی نشستوں پر انتخابات ، الیکشن کمیشن سے جواب طلب

کراچی (اسٹاف رپورٹر)سندھ ہائی کورٹ نے 11 بلدیاتی یونین کمیٹیوں میں انتخابات کرانے سے متعلق جماعتِ اسلامی کی درخواست پر سماعت کرتے ہوئے الیکشن کمیشن و دیگر کو نوٹس جاری کر دیے۔سندھ ہائی کورٹ نے فریقین سے 10 دن میں جواب طلب کر لیا۔عدالتِ عالیہ میں درخواست گزار امیرِ جماعتِ اسلامی کراچی حافظ نعیم الرحمن نے موقف اختیار کیا کہ 11 نشستوں پر چیئرمین اور وائس چیئرمین کے انتخابات نہیں ہوئے تھے۔انہوں نے موقف اپنایا ہے کہ امیدواروں کے انتقال اور دیگر وجوہات کی بنا پر ان نشستوں پر انتخابات نہیں ہوئے، ان 11 نشستوں پر انتخابات کے لیے الیکشن کمیشن سے بھی رجوع کیا گیا تاہم الیکشن کمیشن ان نشستوں پر انتخابات کرانے سے گریز کر رہا ہے۔جماعتِ اسلامی کی درخواست میں استدعا کی گئی ہے کہ مئیر شپ کے عمل کو مکمل کرنے کے لیے فوری انتخابات کروائے جائیں، الیکشن کمیشن کو فوری 11 نشستوں پر انتخابات کرانے کا حکم دیا جائے۔