فحش جگت بازی کے بغیر عوام کو کیسے ہنسایا جاتا ہے ؟ امانت چن نے بتا دیا
لاہور ( فلم رپورٹر) سینئر اداکار امانت چن نے کہا ہے کہ یہ ضروری نہیں کہ آپ صرف فحش جگت بازی سے ہی سامنے بیٹھنے والے کو محظوظ کریں ، میر اریکارڈ ہے کہ میں نے آج تک سٹیج پر کبھی ذو معنی گفتگو اور جگت نہیں کی بلکہ عام بات چیت کو نئے رنگ اور انداز سے پیش کرتا ہوں اور مجھے داد بھی ملتی ہے ۔ اس کے علاوہ میں ایسی حرکات بھی کرتا ہوں جو تہذیب کے دائرے میں ہوتی ہیں اور لوگ ا س پر ہنسنے پر بھی مجبور ہو جاتے ہیں، میں نے ہمیشہ اپنے معیاری کام سے شائقین کے دل جیتنے کی کوشش کی ہے۔
امانت چن کا مزید کہنا تھا کہ ہمیں یقینی طو رپر سٹیج ڈرامے کی بہتری کےلئے سوچ بچار کرنی چاہیے اور میرے خیال میں معیا رکو بر قرار رکھنے کےلئے از سر نو غوروخوض کرنا ہوگا ۔ پاکستان میں اداکاری سمیت ہر شعبۂ زندگی میں بڑا ٹیلنٹ موجود ہے لیکن نئے اداکاروں کوسیکھنے کیلئےکوئی پلیٹ فارم میسر نہیں اوروہ سینئر اداکاروں کو دیکھ کر سیکھتے ہیں۔
