فلموں میں زندگی کے شعبے پیش ہوتے ہیں، سیکھنے کا موقع ملتاہے،عمارہ بٹ

فلموں میں زندگی کے شعبے پیش ہوتے ہیں، سیکھنے کا موقع ملتاہے،عمارہ بٹ

لاہور(فلم رپورٹر) اداکارہ وماڈل عمارہ بٹ نے کہا ہے کہ دنیا بھرمیں فنون لطیفہ کے مختلف شعبوں سے لوگوں میں شعور اجاگر کرنے کاکام لیا جاتا ہے جب کہ معاشرتی مسائل کو اجاگر کرنے کا اس سے بہترکوئی دوسرا ذریعہ نہیں ہے۔عمارہ بٹ نے کہا کہ دنیاکی تمام بڑی فلم انڈسٹریوں میں ایسی نت نئی کہانیوں پرفلمیں بنائی جارہی ہیں جن کو دیکھ کرعقل دنگ رہ جاتی ہے۔ ان فلموں میں ہماری زندگی سے وابستہ ان تمام شعبوں کو خوبصورتی سے پیش کرنے کے ساتھ ایسی دلچسپ اندازسے معلومات دی جاتی ہے کہ لوگوں کو اس سے سیکھنے کا موقع ملتاہے۔

اوران کے مسائل میں بہت کمی آجاتی ہے لیکن بدقسمتی سے ہمارے ہاں لالی ووڈ میں بننے والی فلموں کی تعداد میں جہاں ہر سال حیرت انگیزکمی آتی رہی ہے، وہیں ان کا معیار بہترہونے کے بجائے متاثرہوا تھا۔

انہوں نے کہا کہ یہی وجہ ہے کہ شائقین کی بڑی تعداد نے پاکستانی فلم سے دوری اختیارکی اوران کا رجحان ٹی وی ڈراموں، تھیٹرکے ساتھ ساتھ غیرملکی فلموں کی جانب بڑھا۔ مگراب ایک مرتبہ پھر سے پاکستانی فلم کا معیار بہترہورہا ہے۔ اس میں کچھ خامیاں دکھائی دیتی ہیں لیکن ان کو درست کیاجاسکتا ہے اورمجھے لگتا ہے کہ نوجوان فلم میکرز اس بارے میں ضرور سوچتے ہوں گے۔عمارہ بٹ نے کہا کہ دیکھاجائے تو ہماری فلموں کی پسندیدگی میں بھی ہردن اضافہ ہورہا ہے اورماضی کی طرح اعلیٰ تعلیم یافتہ فنکاروں کے چاہنے والوں کی تعداد اب بڑھ رہی ہے۔ جہاں تک بات ٹیلنٹ کی ہے توبلاشبہ پاکستانی فنکار کسی سے کم نہیں ہے۔ اس کی بڑی مثال بھارت میں کام کرنیوالے فنکاروں سے بھی دی جاسکتی ہے۔ اگرہمارے فنکارباصلاحیت نہ ہوتے توانھیں کبھی بھی وہاں کام کرنے کی پیشکش نہ کی جاتی۔اداکارہ نے کہا کہ میں بھی بہت جلد سلورسکرین پرجلوہ گرہو ں گی، لیکن اس حوالے سے تفصیلات فی الوقت کنٹریکٹ کے مطابق نہیں دے سکتی۔ مگراپنے چاہنے والوں کو صرف اتنا کہوں گی کہ وہ مجھے ایک نئے روپ اور انداز میں دیکھیں گے، جوان کوخوب انٹرٹین کرے گا۔

مزید : کلچر