تحریک انصاف کا صوابی میں جلسہ، کسی بھی لائحہ عمل کا اعلان نہ ہو سکا 

                                                            صوابی (مانیٹرنگ ڈیسک، نیوز ایجنسیاں) پاکستان تحریک انصاف کے زیراہتمام صوابی میں جلسہ اختتام پذیر ہوگیا جبکہ کسی بھی لائحہ عمل کا اعلان نہ ہوسکا۔علی امین گنڈاپور نے جلسے میں اعلان کرتے ہوئے کہاکہ عمران خان اسی مہینے فائنل کال دیں گے، کارکنان اس کے لیے تیاری شروع کردیں، اب ہم اپنے قائد کو رہا کروائے بغیر واپس نہیں جائیں گے۔وزیراعلیٰ خیبرپختونخوا کا کہنا تھا کہ میں ہمیشہ اپنے کارکنوں کی طرف دیکھتا ہوں کیونکہ آپ عمران خان اور حقیقی آزادی کی طاقت ہیں، پاکستان کو آزاد کرانے کے لیے ہمارے آباؤاجداد نے قربانیاں دیں۔انہوں نے کہا کہ آزادی قربانی کے بغیر نہیں ملتی، اب ہمیں بانی پی ٹی آئی  کی سربراہی میں حقیقی آزادی کے لیے نکلنا ہے، آج ہمیں یہ عہد کرنا ہوگا کہ عمران خان کے دیے گئے ہر حکم پر اپنا تن، من، دھن قربان کرنے سے دریغ نہیں کریں گے۔علی امین گنڈاپور نے کہاکہ کارکنان آج سے فائنل معرکے کی تیاری شروع کردیں، جب بھی کال ملے تو بوریا بستر سمیت ایک سفید چادر سر پر لینی ہیاورعمران خان کو رہا کروانے تک واپس نہیں آئیں گے۔چیئرمین پی ٹی آئی بیرسٹر گوہر نے اپنے خطاب میں کہا کہ صوابی میں ہونے والے جلسے میں ریفرنڈم ہوگیا ہے، اب عمران خان کی رہائی بہت قریب ہے۔ان کا کہنا تھا کہ امریکا میں انتخابی نتائج سامنے آنے کے بعد کچھ لوگ اپنی پرانی ٹوئٹس ڈیلیٹ کررہے ہیں، لیکن میں ان کو کہنا چاہتا ہوں کہ ہم امریکہ سے مدد کے طلبگار نہیں، تبدیلی پاکستان کے اندر سے ہی آئے گی۔بیرسٹر گوہر نے کہا کہ عمران خان کو باہر رکھ کر پاکستان کی سیاست مکمل نہیں ہوسکتی، وہ ایک ہی بات کرتے ہیں کہ میں عوام کے حقوق کی خاطر جیل میں ہوں،بانی پی ٹی آئی کو سہولیات سے محروم رکھا گیا ہے لیکن انہوں نے کبھی بیمار ہونے کا شکوہ نہیں کیا۔چیئرمین پی ٹی آئی کا مزید کہنا تھا کہ حکومت چھبیسویں آئینی ترمیم کے ذریعے مرضی کی عدلیہ چاہتی ہے لیکن ہم عدلیہ کو آزاد کروا کر دم لیں گے۔پی ٹی آئی کے سیکرٹری جنرل سلمان اکرم راجہ نے کہاکہ آج ملک میں جبر کا جو نظام قائم ہے اس کے سامنے کسی پاکستانی کی کوئی حیثیت نہیں، عمران خان کا قوم کے نام پیغام ہے کہ پاکستان کی سڑکیں تمہاری منتظر ہیں۔ اسد قیصر نے کہا ہے کہ عدلیہ کی آزادی،قانون کی بالادستی کیلئے جنگ جاری رکھیں گے، حکمرانوں نے ملک تباہ کر رکھ دیا، افغانستان کیساتھ کاروبار کھولا جائے، پختونخوا ہاؤس پر حملہ صوبے کے عوام اور فیڈریشن پر حملہ ہے،کسی صورت 26ویں آئینی ترمیم نہیں مانیں گے ۔ انہوں نے کہا کہ عمران خان کو رہا،چھینا گیا مینڈیٹ واپس اور آزاد عدلیہ اور قانون کی بالادستی قائم کی جائے۔ انہوں نے کہا کہ حکمرانوں نے ملک کو تباہ کر رکھ دیا ہے، افغانستان کے ساتھ کاروبار ختم کردیا، ہمارا مطالبہ ہے کہ افغانستان کے ساتھ کاروبار کھولا جائے۔

پی ٹی آئی جلسہ