سابق چیف جسٹس پر لندن میں حملہ کرنےکے مقدمے میں نامزد خاتون کا مؤقف آگیا

دبئی (ویب ڈیسک) سابق چیف جسٹس آف پاکستان قاضی فائز عیسیٰ پر لندن میں حملہ کرنے کے مقدمے میں شامل خاتون ماہین فیصل کا مؤقف سامنے آگیا۔

جیونیوز کے مطابق اپنے ویڈیو بیان میں ماہین فیصل کا کہنا تھا کہ  پاکستان میں ایف آئی اے نے مجھ پر ہتک عزت کا مقدمہ غلط قائم کیا ہے،  جس دن یہ  واقعہ پیش آیا میں لندن میں ہی نہیں تھی، ڈیڑھ برس قبل شادی کرکے دبئی منتقل ہوچکی ہوں۔

ماہین فیصل کا کہنا تھا کہ  سابق چیف جسٹس قاضی فائز عیسٰی پر حملے سے میرا کوئی تعلق نہیں ہے۔ پاکستان میں میرے دور کے رشتہ داروں کو بھی ٹارگٹ کیا  جا رہا ہے، ان کے دروازوں  پر  میرے نام کے نوٹس چپکا ئے جاتے ہیں۔

ماہین فیصل کا کہنا تھا کہ میں ایسے واقعےکی مذمت کرتی ہوں،کبھی نہیں چاہوں گی کہ  میرے ملک کی بدنامی ہو۔ میری اپیل ہے کہ میرے خلاف کیس کو ختم کردیا جائے۔