ن لیگ نے باغی ارکان کا ایوان سے نکال دیا، احتجاجی تحریک بارے اہم فیصلے
لاہور (جنرل رپورٹر) مسلم لیگ (ن) کے صوبائی اراکین نے وزیراعلیٰ عثمان بزدار سے ملاقات کرنے والے باغی رکن مولانا غیاث الدین کو اجلاس میں شرکت سے روکتے ہوئے ایوان سے نکال دیا۔ذرائع کے مطابق مسلم لیگ (ن) چیف وہب خلیل طاہر سندھو نے مولانا غیاث الدین کو ایوان میں بیٹھنے سے منع کیا۔ اس کے جواب میں باغی رکن نے کہا کہ وزیراعلی سے ملاقات کرنا میرا حق ہے، کسی کی اجازت طلب کرنا ضروری نہیں سمجھتا۔خیال رہے کہ مسلم لیگ (ن) کی ٹکٹ پر ممبر صوبائی اسمبلی منتخب ہونے والے مولانا غیاث الدین نے اپنے دیگر چار ساتھیوں کے ہمراہ کچھ روز قبل وزیراعلیٰ پنجاب سردار عثمان بزدار سے ملاقات کی تھی۔ لیگی قیادت نے اس ملاقات پر سخت ناراضی کا اظہار کرتے ہوئے ان پانچوں اراکین کو اپنی پارٹی سے نکالنے کا اعلان کر دیا تھا۔ قیادت کی منظوری کے بعد (م) لیگ کے سیکریٹری جنرل احسن اقبال نے اس فیصلے کا اعلان کیا تھا۔جن اراکین صوبائی اسمبلی نے وزیراعلیٰ پنجاب سے ملاقات کی تھی ان میں خانیوال سے منتخب ہونے والے نشاط احمد ڈاہا اور فیصل خان نیازی، شیخوپورہ سے جلیل احمد شرقپوری اور چودھری اشرف علی جبکہ نارووال سے ایم پی اے مولوی غیاث الدین شامل تھے۔ ان اراکین کے خلاف کارروائی کا آغاز مسلم لیگ نواز پنجاب کے صدر رانا ثنا اللہ کی منظوری کے بعد کیا گیا تھا۔بعد ازاں ایک اور تلخ منظر بھی دیکھنے میں آیا جب اسمبلی اجلاس میں شرکت کیلئے پہنچنے والے رکن اسمبلی جلیل احمد شرقپوری کے سر پر لیگی ایم پی اے میاں رؤف نے لوٹا رکھ دیا۔ اس موقع پر میاں رؤف اور جلیل احمد شرقپوری میں تلخ کلامی بھی ہوئی۔میاں رؤف نے کہا کہ ہم نے آپ کا الیکشن لڑا، اب آپ لوٹے بن گئے ہیں۔ اس کا جواب دیتے ہوئے جلیل شرقپوری نے کہا کہ میں استعفیٰ مرضی سے دوں گا، آپ کے کہنے پر نہیں، (ن) لیگ خود چل کر آئی کہ ہماری ٹکٹ پر الیکشن لڑیں۔دریں اثناء مسلم لیگ ن کا اہم اجلاس ماڈل ٹاؤن میں رانا ثنا اللہ کی زیر صدارت ہوا جس میں اویس لغاری، ندیم کامران، شیخ آفتاب، سائرہ افضل تارڑ، منشا اللہ بٹ، ذیشان رفیق، سعود مجید، راجہ قمر الاسلام سمیت ن لیگ کے ڈویڑنل صدور اور جنرل سیکرٹری شریک ہوئے۔ شرکا ء نے صدر مسلم لیگ ن شہباز شریف اور حمزہ شہباز کو انتقامی کارروائیوں کا نشانہ بنانے پر شدید تحفظات کا اظہار کیاجبکہ گوجرانوالہ جلسہ بارے مریم اورنگزیب، عظمیٰ بخاری، ڈویڑنل صدر عابد علی اور خرم مشتاق پر مشتمل میڈیا کمیٹی قائم کی گئی۔ رانا ثنا ء اللہ گوجرانوالہ میں جلسہ گاہ کا دورہ کریں گے۔ اجلاس میں راولپنڈی، ملتان، ڈی جی خان، بہاولپور میں احتجاجی مظاہروں کا بھی فیصلہ کیا گیا ہے۔ لاہور میں ہونے والے جلسے کے لئے انتظامات کی کمیٹی بھی قائم کردی گئی ہے۔ مذکورہ کمیٹی کا کنونیئر خواجہ سلمان رفیق اور پرویز ملک کو مقرر کیا گیا۔کمیٹی کے دیگر اراکین میں ملک احمد خان، سمیع اللہ خان، میاں مرغوب، میاں نعمان، سیف الملوک کھوکھر، رانا مبشر، رانا ارشد، شیخ وسیم، پیر اشرف رسول اور عمران نذیر شامل ہی۔
ن لیگ اجلاس
