ناصر شاہ اور سعید غنی نے جلسے کے انتظامات کا جائزہ لیا 

کراچی (سٹاف رپورٹر) وزیر اطلاعات و بلدیات سندھ سید ناصر حسین شاہ اور وزیر تعلیم و محنت سندھ سعید غنی نے جمعہ کے روز مزار قائد سے متصل جناح گرانڈ کا دورہ کیا۔جناح گرانڈ میں 18 اکتوبر کو پیپلز پارٹی کی میزبانی میں پی ڈی ایم اے کے تحت جلسہ عام منعقد ہونا ہے۔صوبائی وزرا نے جلسہ گاہ میں اسٹیج کی تیاری، مرد و خواتین انکلوژر، میڈیا انکلوژر سمیت دیگر کے حوالے سے تفصیلی معائنہ کیا۔اس موقع پر صوبائی وزرا نے کہا کہ 18 اکتوبر کو ہونے والا جلسہ اس ملکی تاریخ کا تاریخی جلسہ ہوگا۔ماضی گواہ ہے کہ پیپلز پارٹی کے تحت ہونے والا جلسہ ہو یا ریلیاں اس نے ہمیشہ اپنے ہی ریکارڈ توڑے ہیں اور مخالفین کو باور کرایا ہے کہ ملکی سیاست میں انقلاب بھی یہاں سے ہی آئے گا۔انہوں نے کہا کہ 18 اکتوبر کا جلسہ تمام اپوزیشن جماعتوں کا گلدستہ ہوگا۔ہم نے کوشش کی ہے کہ اس جلسہ کی وجہ سے ٹریفک کی روانی بھی متاثر نہ ہو اور عوام کو کم سے کم پریشانی کا سامنا کرنا پڑے.