بن میں ویراں تھی نظر شہر میں دل روتا ہے| غلام محمد قاصر |

بن میں ویراں تھی نظر شہر میں دل روتا ہے

زندگی سے یہ مرا دوسرا سمجھوتا ہے

لہلہاتے ہوئے خوابوں سے مری آنکھوں تک

رَت جگے کاشت نہ کر لے تو وہ کب سوتا ہے

جس کو اس فصل میں ہونا ہے برابر کا شریک

میرے احساس میں تنہائیاں کیوں بوتا ہے

نام لکھ لکھ کے ترا پھول بنانے والا

آج پھر شبنمیں آنکھوں سے ورق دھوتا ہے

تیرے بخشے ہوئے اک غم کا کرشمہ ہے کہ اب

جو بھی غم ہو  مرے معیار سے کم ہوتا ہے

سو  گئے شہر محبت کے سبھی داغ و چراغ

ایک سایہ پسِ دیوار  ابھی روتا ہے

یہ بھی اک رنگ ہے شاید مری محرومی کا

کوئی ہنس دے تو محبت کا گماں ہوتا ہے

شاعر: غلام محمد قاصر

(مجموعۂ کلام:آٹھواں آسماں بھی نیلا ہے؛سالِ اشاعت،1988 )

Ban   Men   Veraan   Thi   Nazar   Shehr   Men   Dil   Rota   Hay

Zindagi   Say   Yeh   Mira   Doosra    Samjhota   Hay

Lehlahaatay   Huay   Khaabon   Say   Miri   Aankhon  Tak

Rat   Jagay   Kasht   Na   Kar   Lay   To   Wo   Kab   Sota   Hay

Jiss   Ko   Iss   Fasl   Men   Hona   Hay   Baraabar   Ka   Shareek

Meray   Ehsaas   Men   Tanhaaiyaan    Kiun   Bota   Hay

Naam   Likh   Likh   K   Tira    Phool   Banaanay   Waala 

Aaj   Phir   Shabnameen   Aankhon   Say   Waraq    Dhota   Hay

Teray   Bakhshay   Huay   Ik   Gham   Ka    Karishma    Hay   Keh   Ab

Jo    Bhi   Gham   Ho   Miray    Mayaar   Say   Kam   Hota   Hay

So   Gaey   Shehr-e-Muhabbat   K   Sabhi   Daagh -o-Charaagh

Aik    Saaya   Pas-e-Dewaar    Abhi   Rota   Hay

Yeh    Bhi   Ik    Rang    Hay   Shayad    Miri   Mehroomi   Ka

Koi   Hans    Day   To   Muhabbat    Ka   Gumaan    Hota   Hay

Poet: Ghulam  Muhammad   Qasir