رکن پنجاب اسمبلی حافظ فرحت عباس اور فرخ جاوید مون بھی قائمہ کمیٹیوں سے مستعفی، تعداد 7 ہو گئی
لاہور (ڈیلی پاکستان آن لائن) تحریک انصاف کا قائمہ کمیٹیوں سے مستعفیٰ ہونے کا سلسلہ جاری ہے، پنجاب اسمبلی کے رکن حافظ فرحت عباس اور فرخ جاوید مون بھی قائمہ کمیٹی سے مستعفیٰ ہوگئے۔
حافظ فرحت عباس نے قائمہ کمیٹی برائے ماحولیات اور داخلہ کی رکنیت سے استعفیٰ دیا جبکہ فرخ جاوید مون نے قائمہ کمیٹی برائے ہوم اور لیبر دونوں کی رکنیت سے استعفیٰ دیا۔ جس کے بعد قائمہ کمیٹیوں سے پی ٹی آئی کے مستعفی ارکان کی تعداد 7 ہو گئی۔
قبل ازیں استعفیٰ دینے والوں میں ایم پی اے ثنا کریمی، رانا شہباز، اویس ورک، ملک ممتاز اور شیخ امتیاز شامل ہیں۔
اسی طرح پنجاب اسمبلی سے احمر رشید بھٹی نے اسمبلی کی قائمہ کمیٹیوں سے استعفی دیا ہے، احمر رشید بھٹی انرجی، لاء انفورسمنٹ، لیجسلیشن کی قائمہ کمیٹیوں سے مستعفی ہوئے۔
رکن اسمبلی نے پلاننگ اینڈ ڈویلپمنٹ، لیبر اینڈ ہیومن ریسورس کی کمیٹیوں سے بھی استعفی دے دیا۔ احمر رشید بھٹی نے بزنس ایڈوائزری اینڈ ایتھکس کمیٹی سے بھی استعفی دے دیا اور استعفی اسپیکر آفس میں جمع کروادیا۔
