قومی کرکٹ ٹیم کب نیوزی لینڈ کا دورہ کرے گی؟ تفصیلات سامنے آ گئیں

 لاہور ( ڈیلی پاکستان آن لائن ) قومی کرکٹ  ٹیم  کب نیوزی لینڈ کا دورہ کرے گی؟ اس حوالے سے اہم  اطلاعات  سامنے آ ئی ہیں ۔ تفصیلات کے مطابق   پاکستان کرکٹ ٹیم آئندہ سال نیوزی لینڈ کا دورہ کرے گی۔پاکستان کرکٹ بورڈ اور نیوزی لینڈ کرکٹ کے درمیان پاکستان کرکٹ ٹیم کے دورہ نیوزی لینڈ میں ردو بدل کے حوالے سے بات چیت جاری ہے۔پی سی بی اور نیوزی لینڈ نے باہمی رضا مندی سے پاکستانی ٹیم کے دورہ نیوزی لینڈ کو آئندہ برس کے اوائل میں رکھا ہے۔

 "جیو نیوز " نے  ذرائع کے حوالے سے بتایا ہے  کہ پی سی بی اور نیوزی لینڈ کرکٹ کے درمیان وائٹ بال سیریز کے لیے بات چیت جاری ہے کیونکہ ایف ٹی پی کے مطابق نیوزی لینڈ نے آئندہ برس کے اوائل میں پاکستان کی میزبانی کرنی ہے لیکن چیمپئنز ٹرافی سے قبل جنوری فروری میں پی سی بی نے سہ فریقی سیریز کا انعقاد کرنا ہے۔سہ فریقی سیریز کی وجہ سے اب پاکستان ٹیم چیمپئنز ٹرافی کے بعد نیوزی لینڈ کا دورہ کرے گی۔نیوزی لینڈ کرکٹ نے تصدیق کی ہے کہ چند ہفتوں میں معاملات طے ہو جائیں گے۔

پاکستان کے دورے میں 3 ون ڈے اور 3 ٹی ٹوئنٹی میچز کی سیریز شامل ہے جبکہ سہ فریقی سیریز کے لیے 2ٹیموں نیوزی لینڈ اور جنوبی افریقہ نے تصدیق کی ہوئی ہے۔