لاہور چیمبر اور نیدرلینڈز میں پاکستان مشن تجارت بڑھانے کیلئے مل کر کام کرینگے

لاہور چیمبر اور نیدرلینڈز میں پاکستان مشن تجارت بڑھانے کیلئے مل کر کام ...

  

لاہور(کامرس رپورٹر)لاہور چیمبر اور نیدر لینڈز میں پاکستان مشن دوطرفہ تجارت بڑھانے کے لیے مل کر کام کریں گے۔ یہ فیصلہ نیدرلینڈز میں پاکستانی سفیر عفت عمران گردیزی اور لاہور چیمبر کے نائب صدر ناصر سعید کے درمیان لاہور چیمبر میں ہونے والی ملاقات میں ہوا۔ دونوں نے اس بات پر بھی اتفاق کیا کہ تجارتی وفود اور تجارتی معلومات کے تبادلے پر خاص طور پر توجہ دی جائے گی۔ سفیر نے کہا کہ نیدرلینڈز کی مارکیٹ تک رسائی پاکستانی مصنوعات کے لیے علاقے کے دیگر ممالک کے دروازے بھی کھول سکتی ہے۔ انہوں نے کہا کہ تجارت بڑھانے کے لیے تجارتی وفود کے تبادلے اور تجارتی میلوں و نمائشوں میں حصہ لینے کی ضرورت ہے۔ انہوں نے کہا کہ پاکستانی تاجر نیدرلینڈز کی مارکیٹ پر غلبہ پانے کے لیے بہترین حکمت عملی وضع کریں۔ لاہور چیمبر کے نائب صدر ناصر سعید نے کہا کہ نیدرلینڈز یورپ، جرمنی اور بیلجیئم کی مارکیٹوں سے بھرپور فائدہ اٹھانے میں پاکستان کی مدد کرسکتا ہے۔ انہوں نے کہا کہ دونوں ممالک کے تجارتی تعلقات کی جھلک تجارت میں بھی نظر آنی چاہیے۔

مزید :

کامرس -