پنجاب حکومت کے ہیلی کاپٹر کے عملے کو بازیاب کروانے کیلئے کوششیں جاری ہیں:ترجمان دفتر خارجہ
اسلام آباد(مانیٹرنگ ڈیسک)ترجمان دفتر خارجہ نے کہاہے کہ پنجاب حکومت کے ہیلی کاپٹر کے عملے کو بازیاب کروانے کیلئے کوششیں جاری ہیں اور جیسے ہی مثبت پیش رفت ہو گی اس سے متعلق قوم کو آگاہ کیا جائے گا۔
تفصیلات کے مطابق کچھ دیر قبل نجی ٹی وی جیونیوز نے اپنے ذرائع کے حوالے سے دعویٰ کیا تھا کہ پنجاب حکومت کے ہیلی کاپٹر کے عملے کو بازیاب کروا لیا گیاہے ،تمام عملے کو چترال کے سرحدی علاقے میں پاکستان کے حوالے کیا گیاہے۔چار اگست کو پنجاب حکومت کا ہیلی کاپٹر اورہالنگ کیلئے ازباکستان میں روسی بیس پر جارہاتھا لیکن فنی خرابی کے باعث افغانستان کے صوبے لوگر میں کریش لینڈنگ کرنی پڑ گئی ،لوگر کا علاقہ افغان طالبان کے قبضے میں ہےاور تمام عملے کو کریش لینڈنگ کے بعد طالبان کی جانب سے تحویل میں لے لیا گیاتھا ۔ ۔پنجاب حکومت کے ہیلی کاپٹر میں روسی پائلٹ سرگئی سیاس تیانوف ،کرنل(ر)صفدر، میجر(ر)صفدر، لیفٹیننٹ کرنل (ر)شفیق، لیفٹیننٹ (ر)ناصر، کریوچیف کوثر اورسویلین داود سوار تھے۔
ترجمان دفتر خارجہ نے کہا ہے کہ پنجاب حکومت کے ہیلی کاپٹر کے عملے کو بازیاب کروانے کیلئے کوششیں جاری ہیں اور جیسے ہی مثبت پیش رفت ہو گئی اس سے متعلق قوم کو آگاہ کیا جائے گا۔