کرپشن کیس ، پاناما پیپرز سکینڈل کی موجد ’’موزیک فونیسکا ‘‘ کے مالکان گرفتار

کرپشن کیس ، پاناما پیپرز سکینڈل کی موجد ’’موزیک فونیسکا ‘‘ کے مالکان ...

پاناما سٹی (مانیٹرنگ ڈیسک) پاناما پیپرز سکینڈل کی وجہ بننے والی لاء فرم موزیک فونسیکا کے مالکان کو برازیل میں ’ لاوا جاتو‘ کرپشن کیس میں گرفتار کرلیا گیا ۔غیر ملکی میڈیا کے مطابق کمپنی کے مالکان جرگن موزیک اور ریمون فونیسکا کو پاناما میں اچانک ان کے دفتر پر چھاپہ مار کر جمعرات کے روز گرفتار کیا گیا جس کا اعلان گزشتہ روز کیا گیا ۔ پولیس حکام کا کہنا ہے کہ اس فرم کے خلاف گزشتہ ایک سال سے تحقیقات کی جا رہی تھی اور طویل تحقیقات کے بعد ہی فرم کے دفتر پر چھاپہ مار کر مالکان کو گرفتار کیا گیا۔دوسری جانب موزیک فونسیکا کے مالک ریمون فونسیکا کا کہنا ہے کہ ان کا لاوا جاتو کرپشن سکینڈل سے کوئی لینا دینا نہیں اور نہ ہی وہاں کی کسی کمپنی کے ساتھ ہمارے معاملات چل رہے ہیں۔پاناما کے اٹارنی جنرل کینا پورسیل کا کہنا ہے کہ لا فرم موزیک فونسیکا آف شور کمپنیاں بنانے میں مہارت رکھتی ہے جبکہ اس نے مجرمانہ سرگرمیاں سر انجام دیتے ہوئے دنیا کے مختلف خطوں میں پیسے چھپانے کا کام بھی کیا۔ تحقیقات میں واضح ہوا کہ اس کمپنی نے اپنے لوگوں کے ذریعے برازیل سے پیسے پاناما منتقل کرائے اور بڑی صفائی کے ساتھ اس کے شواہد مٹا دیے۔ لاوا جاتو یا آپریشن کار واش برازیل کی سرکاری آئل کمپنی پیٹرو براس میں ہونے والے بڑے کرپشن سکینڈل کا نام ہے۔واضح رہے کہ اسی لا فرم موزیک فونسیکا کی ایک کروڑ 10 لاکھ دستاویزات چوری ہونے پر دنیا بھر میں پاناما سکینڈل سامنے آیا تھا۔

موزیک فونسیکا

مزید : کراچی صفحہ اول