ترک صدر طیب اردگان کا اختیارات میں اضافے کیلئے تحاویز پر 16 اپریل کو ریفرنڈم کرانے کا اعلان
انقرہ(ڈیلی پاکستان آن لائن)ترک صدر طیب اردگان نے اختیارات میں اضافے کیلئے تحاویز پر 16 اپریل کو ریفرنڈم کرانے کا اعلان کیا ہے۔
خبر رساں ادارے رائٹرز کے مطابق صدر رجب طیب اردگان نے جمعے کو اصلاحات کے بل پر دستخط کیے ہیں جس سے رائے شماری کی راہ ہموار ہو گئی ہے،ان تجاویز کے تحت جدید ترکی میں پہلی بار ایگزیکٹیو پریزیڈنسی کا قیام عمل میں لانے کے لیے کہا گیا ہے۔
صدر کے پاس نئی اصلاحات کی منظوری کے بعد نئے اختیارات ہوں گے جن کے تحت وہ وزرا کا تقرر کر سکیں گے اور بہت سے قوانین کا حکم جاری کر سکیں گے۔
طیب اردگان کا کہنا ہے کہ یہ تجویز کردہ اصلاحات ترکی کو مزید مستحکم کرنے میں مدد دیں گے تاہم ناقدین صدر پر آمرانہ رویے کا الزام لگا رہے ہیں۔
نئی اصلاحات کے تحت ملک کے وزیراعظم کا عہدہ موجودہ وزیراعظم بن علی یلدرم کے بجائے کسی اور شخصیت کے پاس جائے گا یا پھر اس عہدے کے جگہ نائب صدر لیں گے۔