لاہور میں دھند کاراج، بیشتر شہروں میں کل بارش کا امکان

لاہور (لیڈی رپورٹر)محکمہ موسمیات نے پنجاب سمیت ملک کے بیشتر علاقوں میں گرج چمک کے ساتھ بارش کی نوید سنا دی۔شہر لاہور میں ٹھرٹھراتی سردی اور دھند کا راج ہونے کے با عث ہر منظر دھندلانے کے با عث حد نگاہ میں کمی آئی ہے۔محکمہ موسمیات نے آئندہ 48 گھنٹوں میں بارش کی پیش گوئی کی ہے۔محکمہ موسمیات کے مطابق لاہور میں درجہ حرارت 8 ڈگری سینٹی گریڈ ریکارڈ کیا گیا ہے اور زیادہ سے زیادہ درجہ حرارت 16 ڈگری سینٹی گریڈ تک جانے کا امکان ہے۔ فضائی آلودگی کے حوالے سے لاہور عالمی درجہ بندی میں 9ویں نمبر پر آ گیا ہے جبکہ ائیر کوالٹی انڈیکس کی مجموعی شرح 166 ریکارڈ کی گئی ہے۔ کراچی میں سردی کی حالیہ لہر میں معمولی کمی دیکھنے کو ملی جبکہ شہر کا موسم سرد اور خشک ہے۔ 12 جنوری تک سردی کی شدت کم رہنے کا امکان ہے۔ تاہم کراچی میں فضائی معیار مضر قرار دیا گیا ہے۔ کراچی دنیا کے آلودہ ترین شہروں میں ساتویں نمبر پر اور پاکستان کے آلودہ ترین شہروں میں دوسرے نمبر پر موجود ہے۔بالائی علاقوں میں برفباری کے بعد نظارے حسین ہوگئے۔پہاڑوں نے سفید چادر اوڑھ لی، گلگت بلتستان، کے پی اور بلوچستان کے مختلف علاقوں میں پارہ نقطہ انجماد سے بھی کئی درجے نیچے آگیا، لہہ میں پارہ منفی 13،استور میں منفی 12 رہا۔گوپس، کالام، سکردو منفی 9، بگروٹ، ہنزہ میں منفی 6 ریکارڈ کیا گیا، قلات، گلگت منفی 5، کوئٹہ، منفی 4، دیر اور راولا کوٹ میں منفی 3 رہا۔ رپورٹ کے مطابق سیالکوٹ، نارووال،گوجرانوالہ، منگلا، جہلم، لاہور، شیخوپورہ، قصور،ا وکاڑہ، ساہیوال میں شدید جبکہ فیصل آباد، بہاولپور، بہا ولنگر، رحیم یار خان،ملتان،ڈیرہ غازی خان اور گردونواح میں چند مقامات پر درمیانی دھند پڑنے کی توقع ہے۔سندھ کے بیشتر اضلاع میں موسم سرد اورخشک رہنے کا امکان ہے گھوٹکی،سکھر،خیر پور، سانگھڑ،عمرکوٹ، تھر پارکر اور گردونواح میں چند مقامات پر تیز ہوا ؤں اور گرج چمک کے ساتھ بارش کا امکان ہے۔ کشمیر اور گلگت بلتستان میں موسم شدید سرد اور خشک رہنے کا امکان ہے۔

موسم