عراق نے پاکستان سے جے ایف 17لڑاکا طیارے خریدنے کے لیے معاہدہ کر لیا

اسلام آباد(مانیٹرنگ ڈیسک) عراق نے پاکستان سے جے ایف 17لڑاکا طیارے خریدنے کے لیے معاہدہ کر لیا۔ ڈیلی پاکستان گلوبل کے مطابق عراقی وزیردفاع جمعہ عناد نے بتایا ہے کہ پاکستان سے حاصل کیے گئے جے ایف 17طیارے اینٹی ڈرون آپریشن کے لیے استعمال کیے جائیں گے۔
رپورٹ کے مطابق حالیہ مہینوں میں عراق میں ڈرون حملوں کے خطرے میں اضافہ ہوا ہے، جس سے نمٹنے کے لیے عراق نے پاکستان سے جے ایف 17خریدنے کا فیصلہ کیا۔ عراقی وزیردفاع کا کہنا تھا کہ ہمیں جلد کچھ طیارے مل جائیں گے اور مستقبل میں ہم مزید طیارے آرڈر کریں گے۔
 ان کا کہنا تھا کہ ”ہم پاکستان کے جے ایف 17تھنڈر بلاک تھری فائٹر طیاروں سے اپنے دفاعی نظام کو بہتر بنانا چاہتے ہیں۔ “ذرائع کی طرف سے بتایا گیا ہے کہ عراقی حکومت نے ان طیاروں کی خریداری کے لیے 66کروڑ40لاکھ ڈالر کے فنڈز بھی منظور کر دیئے ہیں۔