ڈیموں کی تعمیر کے لیے کتنے ارب روپے رکھے گئے ہیں؟ تفصیلات سامنے آگئیں

اسلام آباد(ڈیلی پاکستان آن لائن )وفاقی حکومت نے آئندہ بجٹ میں پانی کے مسائل پر قابو پانے کے لیے91 ارب روپے مختص کئیے ہیں۔
تفصیلات کے مطابق وفاقی وزیر خزانہ شوکت ترین نے بجٹ تقریر کے دوران بتایا کہ پاکستان تیزی سے پانی کی کمی کا شکار ہو رہا ہے۔ وزیراعظم پانی کی ذخیرہ گاہوں، چھوٹے، درمیانے اور بڑے ڈیمز کی تعمیر کے خواہشمند ہیں تاکہ مستقبل میں ہماری پانی کی ضرورت پوری کی جا سکے۔تین بڑے ڈیم داسو، دیا مر بھاشا اور مہمند کی تعمیر بجٹ میں ہماری ترجیح ہو گی، ہمارا مقصد ان منصوبوں کی وقت پر تکمیل ہے۔ بجٹ میں آبی تحفظ کو یقینی بنانے کے لیے کل 91 ارب روپے رکھے جا رہے ہیں۔ پانی سے بجلی بنانے کے منصوبے اس کے علاوہ ہیں۔ داسو ہائیڈرو پراجیکٹ کے  پہلے مرحلے کے لیے 57 ارب روپے رکھے گئے ہیں۔دیا مر بھاشا ڈیم کے لیے 23 ارب روپے رکھے جا رہے ہیں۔مہمند ڈیم کے لیے 6 ارب روپے مختص کیے جا رہے ہیں۔نیلم جہلم ہائیڈرو پراجیکٹ کےلیے 14 ارب روپے کی تجویز ہے۔
انکا کہنا تھا کہ  آبی تحفظ میں اضافے کے لیے بہت سے دیگر منصوبے بھی زیر عمل ہیں جن میں دروٹ ڈیم، خٹ بانڈا ڈیم، ماخ بانڈا ڈیم، پیزر ڈیم، سری کالاش، وینڈر ڈیم شامل ہیں۔