اینجلیو میتھوز کرکٹ ورلڈ کپ کوالیفائرز کیلئے ٹیم سے باہر
کولمبو (نیٹ نیوز)سابق سری لنکن کپتان اینجلو میتھیوز کو زمبابوے میں ہونیوالے آئی سی سی مینز کرکٹ ورلڈکپ کوالیفائرز کیلئے ٹیم سے باہر کردیا گیا۔ 2 سال کے طویل عرصے کے بعد سری لنکن ٹیم میں واپسی کرنے والے سابق لنکن کپتان اینجلو میتھیوز کو ناقص کارکردگی کے باعث آئی سی سی مینز کرکٹ ورلڈکپ کوالیفائرز کیلئے ٹیم سے ڈراپ کردیا گیا۔اینجلو میتھیوز نے رواں سال نیوزی لینڈ اور افغانستان کے خلاف سیریز میں لنکن ٹیم کی نمائندگی کی تھی تاہم وہ کوئی بڑی اننگز کھیلنے میں کامیاب نہیں ہوسکے تھے۔دوسری جانب سلیکٹرز کی جانب سے لنکن اسکواڈ میں مزید کوئی تبدیلی نہیں کی گئی ہے، اسکواڈ میں کپتان داسن شناکا، کوشل مینڈس، پاتھم نسانکا، چارتھ اسالنکا، دھننجایا ڈی سلوا اور سماراویکراما، چمیکا کرونارتنے، ونندو ہسرنگا شامل ہیں۔ سری لنکا اپنی کرکٹ ورلڈ کپ کوالیفائر مہم کا آغاز 19 جون کو متحدہ عرب امارات (یواےای) کے خلاف بلاوایو میں کرے گا۔
