موٹروے کے وسط میں دنیا کا واحد خوبصورت فارم !
انگلستان میں ویسٹ یارکشائر کے علاقے کیلیڈر ڈیل میں سکاٹ ہال نامی یہ فارم ایک مصروف موٹروے کے درمیان میں موجود ہے، یہ دنیا بھر میں واحد فارم ہے جو کسی موٹروے کے وسط میں واقع ہے۔اس کے ارد گرد رکاوٹیں اور باڑ نصب ہے تاکہ فارم میں موجود مویشی اندر ہی موجود رہیں اور تیز رفتار گاڑیاں بھی محفوظ طریقے سے گزر سکیں۔ یہ فارم شمالی انگلینڈ کے لیورپول اور ہل نامی شہروں کو ملانے والی ایم 62 موٹروے پر واقع ہے۔یہ منفرد فارم اپنی دلکشی کی وجہ سے برطانیہ کے موٹرویز نیٹ ورک کے 10 بہترین مقامات میں شامل ہے، جبکہ اس کے بارے میں مختلف روایتی کہانیاں اور تصورات بھی پائے جاتے ہیں،جن میں سب سے مشہور یہ ہے کہ موٹروے کو دو حصوں میں تقسیم کرنے کی وجہ اس فارم کے مالکان نے جگہ فروخت کرنے سے انکار کرنا تھا، یہ بھی کہا جاتا ہے کہ انہیں بھاری رقوم کی پیشکش کی گئی کہ وہ یہ جگہ موٹروے کی تعمیر کے لیے خالی کر دیں لیکن انہوں نے اسے مسترد کر دیا ، لیکن صحیح صورتِ حال یہ ہے کہ 1983ءکی ایک برطانوی ٹی وی ڈاکومینٹری کے مطابق سکاٹ ہال فارم کے مالکان کو دراصل جگہ فروخت کرنے کے لیے کبھی کہا ہی نہیں گیا۔1960ءکے عشرے میں موٹروے کی تعمیر کے وقت انجینئرز نے یہ تعین کیا کہ اس جنگل میں واقع پراپرٹی میں ارضیاتی نقص موجود ہے، لہٰذا یہ بہتر ہوگا کہ موٹروے اس کے ارد گرد بنائی جائے جس پر انہوں نے فارم مالکان کو وہیں رہنے کی اجازت دے دی۔ فارم کے موجودہ مالکان کا کہنا ہے کہ وہ دنیا کے اس واحد اور عجیب و غریب فارم میں اپنی زندگی سے مطمئن ہیں۔
